MSRTC Bus Saved From Accident : सायंकाळी सव्वाचार वाजताची वेळ... प्रवाशांनी भरलेली एसटी कठडे नसलेल्या अरुंद पुलावर पोहोचली अन् प्रवाशांच्या काळजाचा ठोका चुकला.. अचानक समोरून ट्रक आल्याने बसच्या चालकाने ब्रेक लावला...बस पुलावरून कोसळताना थोडक्यात बचावली अन् प्रवाशांचा जीव भांड्यात पडला... हा थरार बाळापूर नजीकच्या भिकूंड नदीच्या पुलावर बुलडाणा-मोर्शी बसमधील प्रवाशांनी शुक्रवारी अनुभवला.

मोर्शी (जि.अमरावती) आगाराची एमएच ४० ए क्यू ६४६० क्रमांकाची बस बुलडाणा येथून मोर्शीकडे प्रवाशी घेऊन निघाली. अकोला जिल्ह्यातील बाळापूर येथील बसस्थानकावर प्रवाशाची चढ - उतार झाल्यानंतर बस अकोल्याकडे मार्गस्थ झाली.

दरम्यान बस भिकूंड नदी अरुंद पुलावर पोहोचताच समोरून भरधाव ट्रक पुलावर आला. धोका बघून बस चालकाने अचानक ब्रेक लावले. कठडे नसलेल्या पुलावर घडलेल्या या प्रसंगात बस चालकाने प्रसंगावधान राखल्यामुळे बस पुलावरून कोसळताना थोडक्यात बचावली. त्यामुळे मोठा अनर्थ टळला. घटनेनंतर दोन्ही वाहने पुलावर अडकल्याने काही काळासाठी वाहतूक कोंडी झाली होती. (Latest Marathi News)