Nagpur Health: राज्याच्या दुर्गम ग्रामीण भागात सर्पदंशाच्या सर्वाधिक घटना घडतात. नागभूमी म्हणून कधीकाळी प्रसिद्ध असलेल्या नागपूर जिल्ह्यातही वर्षभरात ८० व्यक्तींना सापाने चावा घेतला आहे. मात्र वेळीच उपचारामुळे ८० पैकी ७७ सर्पदंश झालेल्यांना वाचविण्यात डॉक्टरांना यश आले आहे.

वाढलेल्या मानवी वसाहतीमुळे वनांमधील प्राण्यांचे अस्तित्व धोक्यात आले. त्यात सापाचा समावेश होतो. शेतात धुडगूस घालणारे उंदरांचा कर्दनकाळ असलेला हाच साप आता स्वतःचाच जीव वाचवण्यासाठी धडपडत आहे. ग्रामीण भागांत आजही साप दिसणे खूप सामान्य बाब आहे. अनावधानाने सर्पदंश झालेल्या अशाच ७७ जणांना वेळीच उपचार मिळाल्याने त्यांचे प्राण वाचू शकले.

उपचारास विलंब धोक्याचा

२०२३ मध्ये सर्पदंश झालेल्या ८० जणांना वन्यजीव सोसायटीने रुग्णालयात दाखल केले. त्यापैकी ७७ जणांना वेळेत उपचार मिळाले. यामुळे त्यांचे प्राण वाचू शकले. मात्र ३ जणांना सर्पदंशानंतर उपचारासाठी विलंबाने रुग्णालयात पोचले. यामुळे त्यांचा जीव वाचू शकला नाही. मृतांमध्ये ५ वर्षांच्या मुलांसह ६३ वर्षांच्या वृद्धाचा समावेश आहे. सर्पदंशाची बहुतांश प्रकरणे नागपूर ग्रामीणभागातील असल्याची माहिती मिळाली. सर्पदंशामुळे रुग्णालयात दाखल करण्यात आलेल्यांपैकी बहुतांश जण मेयो व मेडिकलमध्ये उपचारासाठी दाखल झाले.

या सर्पमित्रांमुळे वाचला जीव

वाइल्ड लाइफ वेल्फेअर सोसायटीच्या पुढाकारातून सर्पदंश झालेल्यांना उपचारासाठी रुग्णालयात नेण्यात आले. सोसायटीचे नितीश भांदककर, गौरांग वायकर, राकेश भोयर, साहिल शरणागत, सौरभ अस्वार, प्रवीण टुले या यांनी सर्पदंशानंतर गांभीर्य बाळगल्याने डॉक्टरांकडून युद्धपातळीवर वैद्यकीय मदत मिळवून दिली. त्यामुळे नागरिकांचे प्राण वाचवणे शक्य झाले. वेळेवर योग्य मदत न मिळाल्याने ३ जणांचा मृत्यू झाला. (Latest Marathi News)

साप - घटना

वायपर- ४२

मण्यार- ०८

नाग -२९

फुरसे- ०१

असा आहे वयोगट

वयोगट घटना

१८ वर्षाखालील ११

१८ ते ६० वर्षे ५९

६०वर्षांपेक्षा जास्त  १०(Latest Marathi News)