नागपूर : विदर्भात उन्हाच्या लाटेने भीषण रूप धारण केले असून, सोमवारी नागपूरच्या तापमानाने जोरदार उसळी घेत यंदाच्या उन्हाळ्यातील नवा उच्चांक नोंदविला. तर ब्रह्मपुरीच्या पाऱ्याने ४७ अंशांची विक्रमी उडी मारली. प्रादेशिक हवामान विभागाने विदर्भात आणखी दोन दिवस उष्णतेच्या लाटेचा ‘ऑरेंज अलर्ट’ दिल्याने उन्हाचा भडका आणखी वाढण्याची दाट शक्यता आहे.

गेल्या काही दिवसांपासून उन्हाच्या तीव्र झळा सहन करणाऱ्या नागपूरकरांना सोमवारीही नवतपाचे जोरदार चटके बसले. गेल्या २४ तासांत उपराजधानीच्या कमाल तापमानात ३.२ अंशांची वाढ होऊन या मोसमात पारा प्रथमच पंचेचाळिसपार (४५.६ अंश सेल्सिअस) गेला. विदर्भात सर्वाधिक तापमान ब्रह्मपुरी येथे नोंदले गेले. येथे नोंद झालेले ४७.१ अंश सेल्सिअस तापमान विदर्भासह संपूर्ण राज्यात उच्चांकी ठरले. अचानक ऊन वाढल्याने प्रचंड उकाडा जाणवत असून, नागपूरकर अक्षरशः घामाघूम झाले आहेत.