नागपूर : शिवाजीनगर जिमखानाची बास्केटबॉलपटू सिया देवधर हिला अमेरिकेतील शाळेची शिष्यवृत्ती मिळाली असून, यामुळे आता तिला तेथील शालेय व क्लबकडून खेळण्याची संधी मिळणार आहे.

१७ वर्षीय सियाची आतापर्यंतची चमकदार कामगिरी पाहून विचिता (कॅन्सस) येथील लाइफ प्रेप अकादमीचे मुख्य प्रशिक्षक व एनबीएचे ग्लोबल डायरेक्टर ब्लेअर हार्डीक यांनी ऑफर दिली होती. सियाने ही ऑफर स्वीकारली. या अंतर्गत सिया आता बारावीची परीक्षा अमेरिकेत देणार आहे. शिवाय ती अकादमीकडून शालेय स्पर्धा तसेच हुप्स क्लबकडून आंतरक्लब स्पर्धेतही खेळणार आहे. उल्लेखनीय म्हणजे तिच्या राहण्या-खाण्याची तसेच निवासाची सर्व सोय शाळेतर्फे करण्यात येणार आहे. सियाने चांगली कामगिरी केल्यास भविष्यात तिला तेथील कॉलेजकडून आणि नंतर महिलांच्या एनबीएमध्येही संधी मिळू शकते.

हेही वाचा : मैदानावरच्या सरावाला ऑप्शनच नाही, घरात राहून होतंय "बोअर'!

अशाप्रकारची शिष्यवृत्ती मिळणारी सिया ही महाराष्ट्रातील पहिली व देशातील चौथी महिला बास्केटबॉलपटू ठरली आहे. पंजाबच्या दोन व केरळच्या एका खेळाडूला ही शिष्यवृत्ती मिळाली आहे. सियाला मिळालेल्या सुवर्णसंधीबद्दल तिचे प्रशिक्षक छत्रपती पुरस्कारविजेते शत्रुघ्न गोखले यांनी आनंद व्यक्त केला. यानिमित्ताने सियाला दर्जेदार शिक्षण व प्रशिक्षणासोबतच भविष्यात आंतरराष्ट्रीय स्पर्धेची संधीही मिळू शकते. सेंटर पॉइंट शाळेची (काटोल रोड) विद्यार्थिनी असलेली सिया गेल्या सहा वर्षांपासून शिवाजीनगर जिमखाना येथे गोखले व विनय चिकटे यांच्या मार्गदर्शनाखाली नियमित सराव करते. सियाने राष्ट्रीय स्पर्धांमध्ये अनेकवेळा महाराष्ट्राचे प्रतिनिधित्व केले आहे. या गोल्डन ऑफरबद्दल सियानेही आनंद व्यक्त करून, याचे श्रेय प्रशिक्षक व परिवाराला दिले.

संपादन : नरेश शेळके