नागपूर : ‘तुझ्यावर माझे खूप प्रेम आहे... तुला राणी बनवून ठेवेल... अगर तू मेरी नहीं तो मैं तुझे किसी और की भी होणे नहीं दूंगा’ अशी धमकी देत वर्गमित्र असलेल्या युवकाने दोन मुलांची आई असलेल्या मैत्रिणीवर बळजबरी करण्याचा प्रयत्न केला. या प्रकरणी लकडगंज पोलिसांनी गुन्हा दाखल केला असून, आरोपी अटक केली आहे. मोनू भास्कर आडीकने (३३, रा. पडोळेनगर, जयभीम चौक) असे आरोपीचे नाव आहे.

पोलिसांनी दिलेल्या माहितीनुसार, मोनू आडीकने हा मनपाच्या गाडीवर सफाई कामगार आहे. कचरा उचलणाऱ्या गाडीवर फिरत असताना लकडगंजमध्ये राहणारी ३० वर्षीय महिला कचरा टाकण्यासाठी बाहेर आली. त्यावेळी त्या महिलेशी त्याची ओळख झाली. ती महिला आणि मोनू पूर्वी एकमेकांचे वर्गमित्र होते. त्याने तिच्याकडे ओळख काढली. तिनेही त्याला ओळखले.

ओळखीतून तो महिलेच्या घरी यायला लागला. महिलेच्या पतीला कॅन्सर झाला असून, तिला तो मदतही करीत होती. तिला दोन मुले असून ती स्वतः शिलाई काम करते. महिलेच्या घरी वारंवार येत असताना त्याचे तिच्यावर एकतर्फी प्रेम जडले. त्याने तिला दोन मुलांसह स्वीकारण्याची तयारी दर्शवीत लग्नाची मागणी घातली. परंतु, महिलेने नकार दिला. तरीही तो तिच्या पाठीमागे हात धुऊन लागला.

१० जुलैपासून तो तिचे मन वळविण्याचा प्रयत्न करीत होती. परंतु, ती त्याला दोन मुले आणि पती असल्याचे सांगून समजावण्याचा प्रयत्न करीत होती. २५ सप्टेंबरला तिच्या घरी आला. त्याने तिला पुन्हा लग्नाची मागणी घातली. तिने नकार देऊन घरातून बाहेर जाण्यास सांगितले. त्यामुळे चिडलेल्या मोनूने ‘तू जर माझ्याशी लग्न करणार नसेल, तर तुझाही संसार टिकू देणार नाही. तुलाही कुणाची होऊ देणार नाही’ असे म्हणत स्वतः आत्महत्या करण्याची धमकी दिली. तसेच मुलाच्याही गळ्याला चाकू लावून ठार मारण्याची धमकी दिली. यानंतर महिलेने थेट कपिलनगर पोलिस स्टेशन गाठत तक्रार दिली. पोलिसांनी त्वरित गुन्हा दाखल करून आरोपीला अटक केली.