नागपूर : महापालिकेत नागरिकांची गर्दी होत असून अधिकारी व कर्मचारीही कोरोना संसर्गाच्या भीतीने त्रस्त झाले आहेत. अखेर आज आयुक्त राधाकृष्णन बी. यांनी अत्यावश्यक कामाशिवाय नागरिकांनी महापालिकेत येऊ नये, असे आवाहन केले. विविध भागातील नागरिकांच्या प्रवेशामुळे संसर्ग वाढण्याची शक्यताही त्यांनी व्यक्त केली. 

हेही वाचा - कुख्यात गुंड रणजित सफेलकरवर माजी मंत्र्यांचा वरदहस्त,...

कोरोनाचा संसर्ग मोठ्या प्रमाणात वाढत असताना नागरिकांची महापालिकेत वर्दळ कायम असून अधिकारी, कर्मचारी दहशतीत असल्याचे वृत्त 'सकाळ'ने प्रकाशित केले होते. या वृत्ताची दखल घेत आयुक्त राधाकृष्णन बी. यांनी आज मनपा मुख्यालय तसेच झोन कार्यालयात अत्यावश्यक कामाशिवाय येण्याचे टाळावे, असे आवाहन नागरिकांना केले. या संबंधात नुकतेच मिशन बिगीन अगेनअंतर्गत त्यांनी आदेश काढले. मनपा कार्यालयातील गर्दी कमी करण्यासाठी अभ्यागत नागरिकांना अगदी आवश्यक आणि तातडीचे कामासाठीच पूर्व परवानगी घेऊन प्रवेश देण्यात येईल, असे आयुक्तांनी आदेशात नमुद केले. 

हेही वाचा - मोबाईलने घेतलीय चाईल्ड बुकची जागा, शिशू गटासाठी...

अ‌ॅपवर करा तक्रार -
नागरिकांना मनपाच्या कोणत्याही अत्यावश्यक कामाविषयी तक्रार असल्यास मनपाचे 'नागपूर लाइव्ह सिटी' मोबाईल अ‌ॅपवर तक्रार करण्याचे आवाहन आयुक्तांनी केले. या अ‌ॅपव्दारे नागरिकांच्या तक्रारी सोडविण्याबाबत मनपा प्रयत्न करणार आहे. कोव्हिड-१९ संबंधी तक्रार असल्यास कोरोना नियंत्रण कक्षातील ०७१२-२५६७०२१, २५५१८६६ या दूरध्वनी क्रमांकावर संपर्क साधावा अशी सूचनाही त्यांनी केली.