नागपूर:  नागपुरात भारत बायोटेकच्या कोरोनावरील कोव्हॅक्‍सिन लसीच्या क्‍लिनिकल ट्रायलचा दुसरा टप्पा येथील गिल्लूरकर मल्टिस्पेशालिटी हॉस्पिटलमध्ये ११ ऑगस्टपासून सुरू झाला आहे. मंगळवारी ७ जणांना लस टोचून दुसऱ्या टप्प्प्यातील लसीच्या क्‍लिनिकल ट्रायलची सुरूवात झाली. या सात जणांना पहिल्या लसीच्या क्‍लिनिकल ट्रायलचा पहिला डोस २७ जुलै रोजी दिला होता. तर सात दिवसांत ५५ स्वयंसेवकांना लस टोचण्यात आली होती.

हेही वाचा - रामायणातील ‘हनुमान'ने नागपुरात दिली होती किंग काँगला धोबीपछाड, वाचा रुस्तम-ए-हिंदबद्दल...

मंगळवारी पहिल्या टप्प्यातील २०, २२ आणि ३२ वर्षीय युवकांसह ५३ वर्षीय महिलेस कोव्हॅक्‍सिन लसीच्या क्‍लिनिकल ट्रायलचा दुसरा डोस दिला. यानंतर या सर्वांना हॉस्पिटलमध्ये आठ ते दहा तास निरिक्षणात ठेवण्यात आले. १४ दिवसानंतरचा हा डोस दिल्यानंतर त्यांच्या रक्ताचा अहवाल दिल्ली येथे सेंट्रल लॅबकडे पाठविण्यात येईल. या लसीचे पहिल्या टप्प्यातील ५५ व्यक्तींवरील निरीक्षणही सकारात्मक दिसून आल्यानंतरच दुसऱ्या टप्प्यातील ही सुरूवातही यशस्वी होत असल्याचे संकेत मिळाले.

देशातील एकूण १२ केंद्रांवर या चाचण्या होत आहेत. दुसऱ्या टप्प्यातील ५५ जणांचा रक्ताचा अहवाल प्राप्त झाल्यानंतर आणखी २८ दिवसांनंतरचा डोस देण्यात येईल. पुढे ४२, १०४ आणि १९४ व्या दिवशी लस टोचण्यात येईल. प्रत्येकाच्या रक्ताची चाचणी करून ॲन्टिबॉडीची तपासणी करण्यात येईल. यावरच या लसीचे यश अवलंबून असल्याचे डॉ. चंद्रशेखर गिल्लूरकर यांनी ‘सकाळ'ला सांगितले.

वाचा सविस्तर - आयुक्त तुकाराम मुंढे इन ऍक्शन! 'या' खासगी रुग्णालयाला दिले रुग्णांना शुल्क परत करण्याचे निर्देश..वाचा सविस्तर 

डोसचा असाच सकारात्मक परिणाम येईल
"कोव्हॅक्‍सिन लसीच्या प्री-क्‍लिनिकल ट्रायलचा दुसरा टप्पा मंगळवारी सुरू झाला. आज सात जणांना दुसरा डोस दिला. यानंतर सलग सात दिवस ५५ जणांना दुसरा डोस देण्यात येईल. लसीच्या क्‍लिनिकल ट्रायलचा डोस दिल्यानंतर कुणावरही दुष्परिणाम दिसून आला नाही. दुसऱ्या डोसचा असाच सकारात्मक परिणाम येईल, अशी शक्यता आहे".
-डॉ. चंद्रशेखर गिल्लूरकर
संचालक, मल्टिस्पेशालिटी हॉस्पिटल, नागपूर.

संपादन - अथर्व महांकाळ