नागपूर : पोटात दुखत असल्यामुळे १७ वर्षीय विद्यार्थिनी आईसह डॉक्टरांकडे गेली. डॉक्टरांनी तपासून ती अडीच महिन्यांची गर्भवती असल्याचे सांगितले. त्यामुळे तिच्या आईला धक्का बसला. तिने डॉक्टरांवर विश्‍वास न बसल्यामुळे पुन्हा तपासणी करण्याची विनंती केली. खरी बाब समोर आल्यानंतर नातेवाइकांनी मुलीसह पोलिस स्टेशन गाठले. पोलिसांनी अज्ञात आरोपीवर बलात्कार केल्याचा गुन्हा दाखल केला आहे.

पोलिसांनी दिलेल्या माहितीनुसार, १७ वर्षीय मुलगी मानकापूर भागात राहते. ती बारावीची विद्यार्थिनी असून, जानेवारी महिन्यात शिकवणी वर्ग आटोपून पायी घरी जात होती. झिंगाबाई टाकळी परिसरात मोटरसायकलवर आलेल्या युवकाने तिला अडविले व मारहाण केली. विद्यार्थिनी बेशुद्ध झाली. त्यानंतर युवकाने तिला झाडाझुडपात नेऊन बलात्कार केला.

जाणून घ्या - अख्खं गाव हळहळलं! पती-पत्नी पाठोपाठ मुलीचाही मृत्यू, एकाचवेळी निघाली तिघांची अंत्ययात्रा

काही वेळाने तरुणी शुद्धीवर आली. ती घरी गेली. घडलेला प्रकार तिने कुणालाच सांगितला नाही. १९ मार्चला तरुणीच्या पोटात दुखू लागले. नातेवाइकांनी तिला हॉस्पिटलमध्ये नेले. ती अडीच महिन्यांची गर्भवती असल्याचे निदान डॉक्टरांनी केले. तरुणीच्या नातेवाइकाने मानकापूर पोलिसांत तक्रार दिली. पोलिसांनी अत्याचाराचा गुन्हा दाखल केला आहे.

बलात्काराचा बनाव?

मुलगी शिकवणीवरून येताना दुचाकीस्वार युवकाने विनाकारण मारहाण केली आणि कुणीही मदतीसाठी धाव घेतली नाही. तसेच बेशुद्ध मुलीला दुचाकीवरून निर्मनुष्य ठिकाणी नेले आणि तेथे बलात्कार केला, या थेअरीवर पोलिसांचा विश्‍वास बसत नाही. त्यामुळे बलात्काराचा बनाव तर केला नाही, असा संशय पोलिसांना आहे.