नागपूर - शहरातील आनंदम सिटीमध्ये दोन फ्लॅट खरेदी करताना दुय्यम निबंधक कार्यालयात पती-पत्नी असल्याचे सांगून मुद्रांक शुल्क बुडविले. याप्रकरणी सह दुय्यम निबंधक राजू गंगाधर गाजर्लवार (वय ५७, रा. उत्थाननगर) यांनी दिलेल्या तक्रारीवरून पोलिसांनी गुन्हा दाखल केला आहे.

पुनम मनसुखलाल राजकोटीया आणि सागर देविदास खरात अशी आरोपींची नावे आहेत. पोलिसांनी दिलेल्या माहितीनुसार, १३ जुलै २०२३ मध्ये गोदरेजच्या आनंदम वर्ड सिटी टावरच्या ई ब्लॉकमध्ये अठराव्या आणि पहिल्या मजल्यावर पुनम राजकोटीया यांचे दोन फ्लॅट असून त्यापैकी ५० टक्के हिस्सा हा सागर खरात यांच्या नावे केल्याची बक्षिसपत्र केले होते.

दरम्यान तो हिस्सा आपल्या नावे करण्यासाठी त्यांनी सदरमधील दुय्यम निबंधक कार्यालयात अर्ज केला होता. दरम्यान अर्ज करताना, त्यांनी दिलेल्या कागदपत्रांमध्ये सागर हे त्यांचे पती असल्याची बतावणी केली होती. १२ ऑक्टोबर २०२३ मध्ये त्यांनी या कागदपत्राच्या आधारे दोन्ही फ्लॅट आपल्या नावावर केले होते.

नियमाप्रमाणे महाराष्ट्र मुद्रांक अनुच्छेद ३४ नुसार रक्ताच्या नात्यात असलेल्या व्यक्तीला मुद्रांक शुल्कात सवलत देण्यात येते. यासाठी पुनम राजकोटीया यांनी बनावट कागदपत्राचा आधार घेतला. दरम्यान कागदपत्रांची तपासणी केल्यानंतर त्यांचे प्रमाणपत्र खोटे असल्याची बाब समोर आली.

त्यातून त्यांनी सरकारचे सरकारचे १४ लाख ३८ हजार १७५ रुपये असा ७ टक्के मुद्रांक शुल्क बुडविल्याचे आढळून आले. त्यामुळे सहदुय्यम निबंधकांनी दिलेल्या तक्रारीवरून पोलिसांनी दोघांविरोधात सदर पोलिस ठाण्यात तक्रार दिली. तक्रारीची चौकशी करीत गुन्हा दाखल केला असून तपास सुरू केला आहे.