काटोल : ‘बहुजन सुखाय, बहुजन हिताय’ तसेच प्रवाशांच्या सेवेसाठी हे ब्रिदवाक्य घेऊन अहोरात्र धावणारी प्रवाशांची अत्यंत विश्वासू व आवडती एकमेव ‘लालपरी’ आहे. मात्र बहुतांश चालक वाहकांच्या मनमर्जी व अडेलतट्टूपणाचा फटका एसटी महामंडळाच्या तिजोरीला बसत आहे. त्यांचा प्रवाशाप्रति असलेला हा व्यवहार उलटपक्षी अवैध प्रवासी वाहतुकीला चालना देणारा ठरत आहे. वाहक-चालकांच्या मनमर्जीमुळे विद्यार्थ्यांचे नुकसान होत आहे.

जिल्ह्यातील शाळा, कनिष्ठ महाविद्यालये एक जुलैपासून सुरू होत आहेत. याकरिता शाळेकरी विद्यार्थ्यांना बससेवेचा पुरेपुर फायदा मिळावा. तसेच काटोल-नागपूर मार्गावरील महत्त्वाच्या मेटपांजारा बसस्टेशनवर जलद, साधारण सर्व बसेस थांबण्याचे निर्देश व थांबे असूनही अनेक चालक वाहकांच्या हेकेखोरीचा फटका मेंढेपठार-मेटपांजरा बसस्टेशनवरून प्रवास करणारे विद्यार्थी व प्रवाशांना बसत आहे.

मेटपांजरा बसस्टेशनवरून जाणाऱ्या- येणाऱ्या सर्व एसटी बसेस मेटपांजरा येथे थांबतील, अशी सूचना असूनही सूचनांना केराची टोपली दाखविली जात आहे. नागपूर व अमरावती आगारातील काटोल-नागपूर मार्गावरील एसटी प्रवासी वाहतूक करणाऱ्या बससे मेटपांजरा येथे थांबतील, असे आदेश देण्यात यावे, अशी मागणी काटोल तालुका मनसेचे अध्यक्ष व मेटपांजरा ग्रा.पं.चे सरपंच अनिल नेहारे यांनी केली.

'मेटपांजरा बसस्टेशनवर सर्व बसेस थांबवाव्या’

निवेदनात सर्व प्रवासी बससेवा मेटपांजरा बस स्टेशनवर देण्यात यावी, या मागणीची पूर्तता न झाल्यास अखेर मनसे स्टाईल आंदोलन केले जाईल, असेही निवेदनात म्हटले आहे. काटोल आगार व्यवस्थापकांना निवेदन देतेवेळी काटोल पंचायत समितीचे उपसभापती निशिकांत नागमोते, आजनगावच्या सरपंच अश्विनी नागमोते, मेंढेपठारचे सरपंच अभय कोहळे, संजय गजबे, प्रफुल्ल क्षिरसागर, दिलीप हिरूटकर, पवन कोरडे, ईश्वर गायकवाड उपस्थित होते.

या प्रकरणी काटोल आगाराचे आगार व्यवस्थापक अनंत तातर यांना विचारले असता त्यांनी सांगितले की ज्या ज्या प्रवासी बसेसना मेटपांजरा बस स्टेशनवर थांबे दिले आहेत, त्या सर्व बसे त्या थांब्यावर थांबण्याच्या सूचेना दिल्या जातील. तक्रारी आल्यास संबंधित चालक वाहकांवरही नियमानुसार कार्यवाही केली जाईल. प्रवासी व लोकप्रतिनिधींनी सुद्धा एसटी महामंडळाला सहकार्य करावे, असे आवाहन आगार व्यवस्थापक अनंत तातर यांनी केले आहे.