नागपूर : उधारीचे पैसे मागण्यासाठी गेलेल्या कुख्यात गुंडाचा कोयत्याने वार करून खून करण्यात आला. ही घटना रविवारी रात्री सव्वानऊ वाजताच्या सुमारास कळमना पोलिस ठाण्याच्या हद्दीतील विजयनगर परिसरात घडली. याप्रकरणी पोलिसांनी दोघांना अटक केली.

ताहीर उर्फ बाबा जाकीर खान (वय २२ वर्ष रा. गुलशननगर, कळमना) असे मृताचे नाव आहे. पोलिसांनी नंदकुमार सियाराम चकोले (वय ४१), करण नंदकुमार चकोले (वय २१, दोघेही रा. विजयनगर, कळमना) अशी अटकेतील आरोपींची नावे आहेत.

पोलिसांनी दिलेल्या माहितीनुसार, ताहीर हा कुख्यात गुंड असून त्याच्यावर अनेक गुन्हे दाखल आहेत. याशिवाय करण आणि त्याचे वडील हमालीचे काम करतात. ताहीर आणि करणचा लहान भाऊ मित्र होते. सहा महिन्यांपूर्वी ताहीरने करणच्या लहान भावाला वीस हजार रुपये उधार दिले होते. ते परत करण्यासाठी त्याच्याकडे तगादा लावला होता.

मात्र, त्याच्याकडून प्रतिसाद मिळत नव्हता. त्यामुळे रविवारी (ता.१३) त्याने करणच्या लहान भावाला फोन केला. त्याला विजयनगर येथील दारूच्या भट्टीजवळ असलेल्या घराकडे त्याला बोलविले. त्यामुळे ताहीर ईश्‍वर उर्फ पटेल केशव निशाद (वय २१, रा. वैष्णौ देवीनगर, जुना कामठी रोड, कळमना) आणि दीपक बिहारीलाल मिसरीया (वय २५, रा. यशोधरानगर) याच्यासह त्याला भेटायला गेला. तेथे गेल्यावर ताहीरने करणच्या भावाला पैशावरून शिवीगाळ केली. त्यामुळे दोघांत वाद झाला आणि ताहीरने त्याला मारहाण केली.

दरम्यान त्याचा भाऊ करण, लहान भावाचा अल्पवयीन मित्र आणि आई-वडिलांनीही त्यात करण, त्याच्या लहान भावासह पाचही जणांनी तिघांवर हल्ला केला. कोयता आणि लाकडी दांड्याने मारहाण केली. यामुळे ईश्‍वर आणि दीपक दोघेही पळून गेले.

मात्र, ताहीर त्यांच्या तावडीत सापडला. पाचही जणांनी त्याला मारहाण करीत नाल्याजवळ फेकून दिले. दरम्यान ईश्‍वरने ही बाब त्याच्या मोठ्या भावाला सांगितली असता, त्याने घटनास्थळी जाऊन ताहिरला रुग्णालयात दाखल केले. तसेच चकोले कुटुंबाविरोधात कळमना पोलिसांत तक्रार दिली. पोलिसांनी गुन्हा दाखल केला. मात्र, रात्री उशिरा उपचारादरम्यान ताहीरचा मृत्यू झाला. त्यामुळे पोलिसांनी गुन्ह्यातील कलम वाढवित, दोघांना अटक केली असून तपास सुरू केला आहे.

खुनापूर्वी जाणार होता कोराडीला

खून होण्यापूर्वी ताहीर ईश्‍वरला भेटण्यासाठी गेला होता. ईश्‍वर कोराडीला देवीच्या दर्शनाला जात असल्याने त्यानेही त्याच्यासोबत जाण्याचे ठरविले होते. मात्र, त्यापूर्वी त्याला करण चकोले याच्या भावाकडे असलेले उधारीचे वीस हजार रुपये मागायचे असल्याने त्याच्याकडून पैसे घेऊन कोराडीला जाऊ असे सांगितले. तेव्हा त्याने दीपक मिसरिया यालाही सोबत घेतले. मात्र, नियतीचा खेळ वेगळाच असल्याने घडलेल्या प्रकारात ताहीरला आपला जीव गमवावा लागला.