Nagpur Petrol Crisis: नववर्षाच्या पहिल्याच दिवशी शहरात पेट्रोल पंपांवर वाहनांच्या लांबच लांब रांगा लागल्या. ट्रक चालकांनी केंद्र सरकारने लोकसभेमध्ये संमत केलेल्या कायद्यातील जाचक अटीविरुद्ध संप पुकारला आहे. त्याचवेळी इंधन कंपन्यांना पुरवठा करणाऱ्या टॅंकर चालकही तीन दिवसाच्या संपावर गेले आहे.

परिणामी, शहरात पेट्रोल- डिझेलचा तुटवडा जाणवण्याचे अफवा पसरल्याने अनेकांनी पेट्रोल भरण्यासाठी एकच गर्दी केल्याने लांबच लांब रांगा लागल्या आहे. त्यामुळे उद्यापर्यंत शहरातील अनेक पेट्रोल पंप ड्राय होण्याची शक्यता असल्याचे संचालकांचे म्हणणे आहे.

ट्रान्सपोर्ट चालकांचा संप असल्यामुळे तीन दिवस पेट्रोल मिळणार नसल्याबाबत नागरिकांमध्ये संभ्रम आहे, त्यामुळे पेट्रोल पंपांवर लांबलचक रांगा लागल्या होत्या. टँकर चालकांनी संपावर जाण्याचा निर्णय घेतल्याने राज्यात पेट्रोल-डिझेलचा मोठा तुटवडा निर्माण होण्याची भीती व्यक्त केली जात आहे. आंदोलनात बीपीसीएल, एचपीसीएल आणि इंडिया ऑइल या तिन्ही सरकारी तेल कंपन्यांच्या टँकर चालकांचा समावेश आहे.

राज्याच्या विविध भागात टँकर बाहेर न पडल्याने इंधनाचा पुरवठा विस्कळित झाला. टँकर चालकांचा संप लवकर मिटला नाही तर राज्यात पेट्रोल-डिझेल पुरवठा होण्यास अडचणी येऊ शकतात. लांबच लांब रांगा असल्यामुळे पेट्रोल ड्राय होण्याची शक्यता आहे. पंप चालकांकडून कंपन्यांकडून ऑर्डर घेणे बंद केलेले आहे. कारण त्यांच्याचकडे इंधन उपलब्ध नसल्याची माहिती पुढे आली आहे.