नागपूर : अवैध सावकारी करणाऱ्या सावकाराने एका शेतकरी महिलेला शिवीगाळ करण्याचा तर त्याच्या पत्नीने तिची साडी खेचण्याचा प्रयत्न केल्याचा संतापजनक प्रकार नागपूर जिल्ह्यातील भिवापूर तालुक्‍यातील वाकेश्‍वर येथे घडला. शेतकरी महिलेची बेअब्रू होत असताना सावकाराने त्याचे व्हिडिओ चित्रीकरण केले. ते समाज माध्यमांवर व्हायरल झाल्याने राज्यभर खळबळ उडाली आहे.
भाजपतर्फे माजी पालकमंत्री चंद्रशेखर बावनकुळे यांच्या नेतृत्वात या प्रकरणाची सखोल चौकशी करावी आणि दोषीवर तत्काळ कारवाई करावी अशी मागणी जिल्हाधिकारी यांच्याकडे केली आहे. विशेष म्हणजे आघाडी सरकारच्या काळात अवैध सावकारांना कोपरापासून ढोपरापर्यंत सोलून काढण्याची घोषणा केली होती. मात्र, वाकेश्‍वर येथील घटनेमुळे अवैध सावकारी सर्रासपणे सुरूच असल्याचे दिसून येते.
सावकाराने संबंधित महिलेच्या मागे पैसे परत मागण्यासाठी तगादा लावला होता. मात्र, जवळ पैसेच नसल्याने ती टाळत होती. त्यामुळे सावकार व त्याची पत्नी महिलेच्या शेतात धडकले. सावकाराच्या पत्नीने तिला मारहाण केली एवढेच नव्हे तर तिची साडी ओढण्याचा प्रयत्न केला. त्यामुळे घाबरून महिला शेतातून पळून गेली. मंगळवारी हा प्रकार घडला. या घटनेचे व्हिडिओ व्हायरल झाल्याने उपनिबंधकांनी चौकशीचे आदेश दिले आहे.
महिलेला विवस्त्र करण्याच्या प्रकरणाचे पडसाद जिल्हाभर उमटत असतानाच या प्रकरणाची सखोल चौकशी करून दोषींवर त्वरित कडक कारवाई करण्यात यावी, अशी मागणी भारतीय जनता पक्ष जिल्ह्यातर्फे करण्यात आली आहे. माजी पालकमंत्री चंद्रशेखर बावनकुळे यांच्या नेतृत्वात हे शिष्टमंडळ जिल्हाधिकाऱ्यांना भेटले व आपले निवेदन त्यांना दिले. त्यात महिलेची धिंड काढण्यात आली असल्याचे म्हटले आहे.
सत्ताधारी पक्षातील राजकीय कार्यकर्ते या प्रकरणात गुंतले असण्याची शक्‍यता लक्षात घेता दोषींवर तातडीने कठोर ककारवाईची मागणी करण्यात आली आहे. जिल्हाधिकारी व पोलिस अधीक्षकांनाही निवेदन देण्यात आले. याप्रसंगी बावनकुळे यांच्यासोबत जिल्हाध्यक्ष अरविंद गजभिये, आ. सागर मेघे, आ. अनिल सोले, आ. गिरीश व्यास, डॉ. राजीव पोतदार, माजी आ. सुधीर पारवे, आ. सावरकर, माजी आ. मल्लिकार्जुन रेड्डी, माजी आ. अशोक मानकर, किशोर रेवतकर, अनिल निधान, चरणसिंग ठाकर, रमेश मानकर, अशोक धोटे, हर्षल हिंगणेकर आदी उपस्थित होते.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.