गोरेगाव (जि. गोंदिया) : तालुक्‍यातील सोनी येथे किसान राइस मिल आहे. यापासून परिसरात प्रदूषण होत आहे. त्यातच नवीन राइस मिल कारखाना संचालकाने ग्रामपंचायतीकडे ना हरकत प्रमाणपत्रासाठी अर्ज केला आहे. या मिलपासून नागरिकांच्या आरोग्याला धोका आहे.

त्यामुळे ही राइस मिल हटविण्यात यावे व नवीन कारखान्यास परवानगी देऊ नये अशी तक्रार गावकऱ्यांनी ग्रामपंचायत, जिल्हाधिकारी, तहसीलदार, मुख्य कार्यकारी अधिकारी, गटविकास अधिकारी यांच्याकडे केली आहे.

सोनी ते ठाणा या मुख्य मार्गालगत श्रीकृष्ण गौतम यांची किसान राइस मिल आहे. या राइस मिलला ग्रामपंचायतीने एक ऑक्‍टोबर 1997ला शेतकरी हितासाठी परवानगी दिली होती. परंतु, राइस मिल संचालकाने अटी, शर्तींना डावलून कार्य केले आहे. त्यामुळे धुळीमुळे नागरिकांचे अंग खाजविणे, सर्दी, खोकला, शेती नापिकी होणे, पिण्याचे पाणी दूषित होणे यासारखे दुष्परिणाम जाणवत आहेत. मात्र याकडे ग्रामपंचायतीने दुर्लक्ष केले. त्यातच नवीन राइसमिल उभारण्यासाठी संचालक शैलींद्रा श्रीकृष्ण गौतम यांनी ग्रामपंचायतीकडे ना हरकत प्रमाणपत्राकरिता अर्ज दाखल केले आहे.

जाणून घ्या : शेतजमिनीला मोल येताच नात्यात कटुता, एक स्वाक्षरी लाखोंची

नागरिकांच्या आरोग्यास धोका

किसान राइस मिलच्या धुळीमुळे नागरिकांच्या आरोग्यास धोका निर्माण झाला असून ५०० मीटर अंतरावर प्राथमिक आरोग्य केंद्र आहे. त्यामुळे नवीन राइसमिल उभारण्यास परवानगी देण्यात येऊ नये, जुन्या राइस मिललाच इतरत्र हटविण्यात यावे. अन्यथा गावकरी आंदोलन, उपोषण करतील, असे निवेदन नरहरी मेश्राम, श्रावण घारपिंडे, डिंगबर कुरंजेकर, अशोक गजभिये, प्रकाश बघेले, योगराज बावनकर, महेंद्र हरिणखेडे, दिनेश खरोले, बिसराम बावनकर, तेजराम घारपिंडे, ताराचंद विंचूरकर, सागर खोब्रागडे, प्रतीक शेंडे यांनी दिले आहे.

अवश्य वाचा :  १४ महिने उलटूनही मानधनवाढ, नियुक्तीचे आदेश मिळाले नाही; रोहयो कर्मचाऱ्यांचे कामबंद आंदोलन सुरू

परवानगी दिली नाही
सोनी येथे एक 22 वर्षांपूर्वीची राइस मिल आहे. त्याच राइस मिलजवळ नवीन राइस मिल लावण्यासाठी ग्रामपंचायतकडे अर्ज आलेला आहे. गावकऱ्यांच्या मागणीनुसार परवानगी दिली नाही, जुन्या राइस मिलला इतरत्र हटविता येत नाही.
- एम. बी. नंदागवळी
प्रशासक, ग्रामपंचायत, सोनी

(संपादन : दुलिराम रहांगडाले)