अमरावती  : जिल्ह्यातील आसेगाव व नांदगाव खंडेश्वर पोलिस ठाण्याच्या हद्दीत अल्पवयीन मुलीसह एका युवतीवर लैंगिक अत्याचार झाला. त्यापैकी अल्पवयीन मुलगी ही गर्भवती आहे, तर दुसऱ्या युवतीला कथित प्रियकराने लग्नाचे आमिष दाखविल्याचा आरोप तिने तक्रारीत केला आहे. 

आसेगाव पोलिस ठाण्याच्या हद्दीत असलेल्या एका गावात राहणारा 26 वर्षीय युवक सोपान अवघड याने अल्पवयीन मुलीला जनावरांच्या गोठ्यात नेऊन तिचे लैंगिक शोषण केले. त्यानंतर घटनेची वाच्यता करू नये म्हणून जिवाने मारण्यासह बदनामी करण्याची धमकी सुद्धा दिली. या घटनेबाबत आरोपीविरोधात पीडितेने आसेगाव ठाण्यात तक्रार दाखल केली. प्रकरणी पोलिसांनी संशयित आरोपी सोपान अवघडविरुद्ध गुन्हा दाखल करून त्याला अटक केली आहे. सोमवारी (ता.22) त्याला न्यायालयासमोर हजर केले, असे तपास अधिकाऱ्यांनी सांगितले. पीडित मुलगी गर्भवती असल्याचे कळते. 

अवश्य वाचा- तीन महिन्यांची गर्भवती माहेरी आली अन् लोटा घेऊन शौचास गेली, पुढे...

दुसरी घटना नांदगाव खंडेश्वर तालुक्‍यातील एका गावात घडली. चार ते पाच महिन्यांपूर्वी अमरावती येथील प्रशिक वानखडे या 23 वर्षीय युवकाने पीडित युवतीला लग्नाचे आमिष दाखविले. त्यानंतर एका शेतात नेऊन तिच्यावर लैंगिक अत्याचार केला. त्यानंतर काही दिवसांनी पीडितेने आरोपी प्रशिकला लग्नाची गळ घातली असता प्रशिकने लग्न करण्यास नकार दिला. आरोपीने आपली फसवणूक केली असल्याचे लक्षात आल्यानंतर पीडित युवतीने पोलिस ठाण्यात तक्रार दाखल करून आरोपी प्रशिकवर संबंधित आरोप केले.नांदगाव खंडेश्वर पोलिसांनी प्रशिकविरुद्ध गुन्हा दाखल केला असून, तो फरार असल्याचे पोलिसांनी सांगितले.