आर्णी : एकटाच राहणारा इसम अतिमद्यप्राशन करून एका शेडमध्ये झोपी गेला अन् झोपेतच त्याचा मृत्यू झाला. ही घटना शहरातील डागा कॉलनी परिसरात सोमवारी (ता. २९) सकाळी उघडकीस आली. गजानन उर्फ संदीप गोविंद काळे (वय ४३) असे मृताचे नाव आहे.

या प्रकरणात केशव सोनबाजी फुपरे (वय ५२) रा. रुद्रपूर ता. आर्णी यांनी दिलेल्या फिर्यादीवरुन पोलिसांनी अकस्मात मृत्यूची नोंद केली आहे. फिर्यादीनुसार, गजानन उर्फ संदीप हा आर्णी येथे एकटाच राहत होता. त्याला दारूचे व्यसन होते. दारूच्या नशेत तो डागा कॉलनीत एका टिनपत्र्याच्या शेडजवळ झोपला. त्यातच त्याचा मृत्यू झाला.

तो नेहमी दारूच्या नशेत शहरात फिरत होता. त्याला घरदार नसल्याने तो शेडमध्ये रात्री येऊन झोपत होता. अतिशय दारू पिल्याने झोपेतच मरण पावला, अशी फिर्याद दाखल करण्यात आली. त्यावरुन पोलिसांनी नोंद घेउन शवविच्छेदन करण्यात आले. ही कार्यवाही ठाणेदार केशव ठाकरे यांच्या मार्गदर्शनात जमादार देवानंद मुनेश्वर, रवींद्र चव्हाण यांनी केली. ऐनवेळी पोलिसांना गजाननच्या नातेवाइकांची माहिती मिळाली.

त्यानंतर माजी माजी नगरसेवक चिराग शाह यांनी उमरखेड येथे राहणारी गजाननची बहीण ममता पांडे व जावई सचिन पांडे यांना भ्रणध्वनीवरून घटनेची माहिती दिली. त्यामुळे हे दोघेही तातडीने आर्णीत दाखल झाले.