अमरावती : रामगिरी महाराज यांनी केलेल्या वक्तव्याचा निषेध करण्यासाठी राज्याचे उपमुख्यमंत्री अजित पवार यांना अमरावतीत काळे झेंडे दाखविण्याच्या प्रयत्नात असलेल्या नऊ जणांना पोलिसांनी आज स्थानबद्ध केले.

रामगिरी महाराज यांनी अजित पवार यांच्या उपस्थितीत हे विधान केल्याने या दोघांचाही निषेध करीत असल्याचे वाक्य आंदोलकांकडून पोलिसांनी जप्त केलेल्या बॅनरवर दिसून आले. स्थानबद्ध करून या पदाधिकाऱ्यांना नागपुरीगेट ठाण्यात ठेवण्यात आले होते.

ऑल इंडिया कौमी तंझीम व काँग्रेस पक्षाच्या माजी नगरसेवकांचा या आंदोलनात सहभाग होता. मोहंमद अकील, अब्दुल हनिफ अब्दुल मुनाफ, सय्यद नौशाद सय्यद बाबर, अ. करीम अ. रहीम, मोहंमद आरीफ शेख मेहबुब, शेख अन्सार शेख शेख युनूस, अब्दुल रफिक अ. रज्जाक उर्फ रफ्फूसह अन्य दोघे यांचा त्यात समावेश असल्याचे नागपुरीगेटचे पोलिस निरीक्षक हनमंत उरलागोंडावार यांनी सांगितले.

गुरुवारी (ता. २६) सकाळी साडेदहाच्या सुमारास रहमतनगर परिसरातुन निषेधाचे बॅनर घेऊन निघताच या पदाधिकाऱ्यांना ताब्यात घेण्यात आले. उपमुख्यमंत्री अमरावती येथून रवाना झाल्यानंतर स्थानबद्ध केलेल्या लोकांची सुटका करण्यात आली. असे अधिकाऱ्यांनी सांगितले.