समृद्धी महामार्ग आणि अपघात हे ठरलेलं समीकरण झालं आहे. समृद्धी महामार्गावर पुन्हा एकदा अपघात झाला असून एका धावत्या खाजगी लक्झरी बसला आग लागल्याचा प्रकार समोर आला आहे. महामार्गावरील मुंबई कॉरिडॉरवर मेहकरजवळ चेनेज २८० वर ही घटना घडली आहे.

मिळालेल्या प्राथमिक माहितीनुसार बसमधील एसीमध्ये शॉर्ट सक्रिट झाल्याने ही आग लागली. या खासगी बसमध्ये ३० प्रवाशी व दोन चालक होते. सुदैवाने चालकाने तात्काळ प्रवाशांना बसमधून बाहेर काढल्याने मोठा अनर्थ टळला. सिद्धी ट्रॅव्हल्सची ही बस अमरावतीहून पुण्याकडे जात होती.

यापूर्वी देखील बुलढाण्यात समृद्धी महामार्गावर अपघातात खासगी बस आधी एका खांबाला आदळली, त्यानंतर डिव्हायडरला आदळून उलटली. यामुळे या बसला आग लागली. ही आग डिझेलच्या टँकपर्यंत पोहचल्याने स्फोट झाला. ३० जून आणि १ जुलै रोजीच्या मध्यरात्री झालेल्या विदर्भ ट्रॅव्हल्सच्या बसला झालेल्या या अपघातात २५ जणांचा होरपळून मृत्यू झाला होता. या अपघाताने राज्यासह देशाला हदरवून सोडले होते.