पुलगाव/ विरुळ (आकाजी) : बैलजोडी धुण्याकरिता तलावावर गेलेल्या बापलेकाचा पाण्यात बुडून करुण अंत झाला. हिवरा (हाडके) येथे ही घटना घडली. ऐन पोळा सणाच्या दिवशी घडलेल्या या घटनेमुळे गाव शोकात बुडाले आहे. राजू पुंडलिक राऊत (वय ५५), चंद्रकांत राजू राऊत (वय २७) अशी घटनेतील मृतांची नावे आहेत.

पोलिसांनी दिलेल्या माहितीनुसार गुरुवारी बैलपोळा असल्याने शेतकरी राजू पुंडलिक राऊत मुलगा चंद्रकांतसह हिवरा शिवारातील शेताच्या काही अंतरावर असलेल्या तलावावर बैलजोडी धुण्याकरिता गेले. बैल धुण्याकरिता तलावाच्या पाण्यात उतरले. बैल धूत असताना एक बैल पाण्यात सरळ जात होता.

बैलाला तलावाच्या काठावर आणत असताना राजू खोलवर पाण्यात ओढल्या गेल्याने त्यांना वाचविण्याकरता मुलगा चंद्रकांत गेला. यात दोघांचाही तलावात बुडून मृत्यू झाला. ऐन पोळा सणाच्या दिवशी ही घटना घडल्याने हिवरा (हाडके) गावावर शोककळा पसरली आहे.

गाव झाले शोकमग्न

आपल्या सर्जा-राजाप्रति शेतकरीबांधवांनी कृतज्ञता व्यक्त करण्याचा दिवस बैलपोळा आहे. या सणाची शेतकरी आतुरतेने वाट पाहत असतात. बैलाच्या सजावटीसाठी मोठे परिश्रम घेतात. बैलजोडी सजविण्यापूर्वी हिवरा येथील बाप-लेक तलावावर गेले. मात्र, असे काही विपरित घडेल, याची त्यांना पुसटशीही कल्पना नव्हती. तलावातील पाण्यात बुडून बापलेकाचा करुण अंत झाला आणि गाव शाोकमग्न झाले.