नागपूर : भाजपशासीत राज्यांमधील महिलांवर अत्याचार वाढले आहेत. विशेष म्हणजे महिला अत्याचाराच्या प्रकरणांमध्ये भाजप नेते गुंतलेले असून, त्यांच्यावर कुठलीच कारवाई होताना दिसत नाही. याविरोधात कॉंग्रेस नेते खासदार राहुल गांधी यांनी मोर्चा उघडला आहे. भाजपकडे उत्तर नसल्याने खासदार राहुल गांधी यांची नाहक बदनामी करून देशाचे लक्ष इतरत्र वळविण्याचा प्रयत्न भाजपकडून चालविल्यात येत असल्याची प्रतिक्रिया राज्याचे माजी मुख्यमंत्री आमदार अशोक चव्हाण यांनी व्यक्त केली. 

1971च्या युद्धात आजच्याच दिवशी म्हणजे 16 डिसेंबर रोजी भारताने पाकिस्तानचे दोन तुकडे करून बांग्लादेशाची निर्मिती केली होती. या ऐतिहासिक दिवशी भारताच्या तत्कालीन पंतप्रधान इंदिरा गांधी यांच्या कणखर नेतृत्वाचे आणि भारतीय सैन्याने गाजवलेल्या अतुलनीय शौर्याचे स्मरण करण्याऐवजी भारतीय जनता पक्षाने निरर्थक घोषणाबाजी करून राजकारण करण्याचा प्रयत्न केला, असे विधानसभेमध्ये सोमवारी झालेल्या गोंधळाच्या अनुषंगाने भाजपवर सडकून टीका करताना अशोक चव्हाण म्हणाले. 

अधिक माहितीसाठी - ही ब्रिटिशांची विधानसभा आहे का? : देवेंद्र फडणवीस

भाजपकडून महापुरुषांचा वापर

महापुरुषांच्या नावाखाली केवळ राजकारण करण्याची भाजपची ही पहिलीच वेळ नाही. यापूर्वीही भाजपने अनेक महापुरुषांचा आपल्या सोयीने राजकीय वापर करून घेतला आहे. काही महापुरुषांमध्ये वाद होते, असे खोटे चित्र उभे करण्याचा प्रयत्न भाजपकडून करण्यात येत आहे. महात्मा गांधी व डॉ. बाबासाहेब आंबेडकर, पंडित नेहरू व सरदार पटेल, महात्मा गांधी आणि शहीद भगतसिंग, नेताजी सुभाषचंद्र बोस अशा महापुरुषांमध्ये नेहमीच वाद असल्याचा अपप्रचार केला आहे. त्याच प्रयत्नांचा एक भाग म्हणूनच आज भाजपने विधानसभेत गोंधळ घातला, असे अशोक चव्हाण म्हणाले. 

सविस्तर वाचा - अबब! प्रतिष्ठित व्यक्ती कुंटणखान्याचे ग्राहक

कॉंग्रेसने नेहमीच चोख प्रत्युत्तर देईल

राहुल गांधी यांनी झारखंडमधील एका जाहीर सभेत केलेला सावरकरांचा उल्लेख वेगळ्या संदर्भाने होता. त्यांनी देशातील महिलांवरील वाढत्या अत्याचाराच्या अनुषंगाने उचललेल्या मुद्यांना उत्तर देता येत नसल्याने भाजपने जाणीपूर्वक नवा वाद उभा करण्याचा प्रयत्न केल्याचा आरोप आमदार अशोक चव्हाण यांनी केला. भाजपच्या या कारस्थानाला कॉंग्रेसने नेहमीच चोख प्रत्युत्तर देईल, असे अशोक चव्हाण यांनी सांगितले.