पुसद (जि. यवतमाळ) : हिंदवी स्वराज्याचे संस्थापक छत्रपती शिवाजी महाराज यांच्यावरील श्रद्धा कलावंतांच्या मनातही दाटून येते. पुसद येथील युवा कलावंत अभिषेक रूद्रवार याने तिळावर छत्रपती शिवाजी महाराजांची प्रतिमा रेखाटून एक आगळावेगळा विक्रम केला. रविवारी (ता.१९) असलेल्या शिवजयंती निमित्त ही कलाकृती त्याने तयार केली.

बारीक अशा तिळावर छत्रपती शिवाजी महाराज यांची कलाकृती करण्यासाठी त्याने पाच दिवस सराव केला व तीन तासांत ही कलाकृती साकारली. भिंगाचा वापर न करता ही कलाकृती तयार केलेली आहे. साधारणपणे त्याला तिळाचा तीन दशांस मिलिमीटर एवढा आहे.

पुसदच्या अभिषेक रुद्रवारला ’मायक्रो आर्ट’ मध्ये आवड आहे. पुसद येथील अभिषेक सूर्यकांत रुद्रवार या मनस्वी कलावंताने एकाच तिळाचे ब्लेडच्या पात्याने १६ मिनिटे २० सेकंदात चक्क शंभर तुकडे केले आणि त्यांना क्रमांकही दिले. त्याच्या या अभिनव कृतीची दखल घेत ’इंडिया बुक ऑफ रेकॉर्ड’मध्ये नोंद करण्यात आली.

पुसद शहरातील विटावा वॉर्डातील अभिषेक सध्या नांदेड येथील एमजीएम कॉलेजमध्ये बीएफए अंतिम वर्षाला शिकत आहे. मुळात तो कलावंत आहे. मायक्रो आर्ट हा त्याच्या आवडीचा विषय आहे. त्याने आतापर्यंत मोहरी, तांदूळ, हराळी, सुपारी, खडू, पेन्सिल, माचिसची काडी यावर गणपतीचे चित्र रेखाटले आहे. तिळावर चक्क त्याने ए,बी,सी,डी यांसारखे इंग्रजी मुळाक्षरे तर १ ते १० पर्यंतचे अंक लिहिले आहेत. तसेच पेन्सिलच्या टोकावर त्याच्या सूक्ष्म कलाकृती प्रसिद्ध आहे.