गडचिरोली - अहेरी विधानसभेचे आमदार धर्मरावबाबा आत्राम यांनी अलीकडेच अजित पवार यांची साथ देत अन्न व औषध प्रशासन मंत्रीपद मिळवले आहे. तत्पूर्वीच ५ जुलै रोजी नक्षलवाद्यांनी एक पत्रक प्रकाशित केले असून सुरजागड येथील लोहखाणीला धर्मरावबाबा देत असलेल्या उघड समर्थनावरून सडकून टीका केली आहे.

तसेच जनता त्यांना जनआंदोलनात खेचल्याशिवाय राहणार नाही आणि त्यांच्या त्यांच्या कृत्याची किंमत चुकवावी लागेल असे नमूद करत धमकीही दिली आहे.

विशेष म्हणजे राज्याचे अन्न व औषध प्रशासन मंत्री धर्मरावबाबा आत्राम यांना नक्षलवाद्यांनी लोह प्रकल्पावरून मागील हिवाळी अधिवेशनातसुद्धा धमकी दिली होती. आता पावसाळी अधिवेशनादरम्यान पुन्हा एकदा नक्षल्यांचे एक पत्रक प्रसार माध्यमांमध्ये व्हायरल झाले आहे.

भारतीय कम्युनिस्ट पक्ष (माओवादी) पश्चिम सब झोनल ब्युरोचा प्रवक्ता श्रीनिवास याने दोन पानी पत्रक काढून धर्मरावबाबावर टीका केली आहे. सूरजागड लोहखाणीला विरोध अधिक तीव्र करा, असे आवाहन करून या प्रकल्पासह प्रस्तावित सहा लोह उत्खनन प्रकल्पांविरोधात नक्षलवादी उभे असल्याचे म्हटले आहे.

इथे विकासाच्या नावाखाली ग्रामसभांचे अधिकार धुडकावून लावत त्यांच्या परवानगीविना लोह उत्खनन सुरू आहे. तोडगट्टा येथील आंदोलनाला माओवाद्यांचा पाठींबा असल्याचे सांगत पोलिस प्रशासन हे आंदोलन बदनाम करत आहे. येथील आंदोलकांची धर्मरावबाबा आत्राम यांनी भेट घेतली. पण ते खाण कंपन्यांचेच समर्थन करत आहेत.

त्यामुळे जनता धडा शिकवेल. महाराष्ट्र- छत्तीसगड सीमेवर तोडगट्टा येथे सुरू असलेले खाणविरोधी आंदोलन यशस्वी करण्याचे आवाहनही पत्रकातून केले आहे. दरम्यान, नक्षल्यांच्या या धमकीच्या पत्रकाची पोलीस प्रशासनाने गंभीर दखल घेतल्याची माहिती मिळाली आहे.

धमक्यांना घाबरत नाही - आत्राम

गेल्या कित्येक वर्षांच्या प्रतीक्षेनंतर गडचिरोली जिल्ह्यात आता कुठे औद्योगिक विकासाला चालना मिळाली आहे. सूरजागड प्रकल्पामुळे हजारो हातांना काम मिळाले आहे. याच प्रकल्पामुळे कित्येक घरांमध्ये चुली पेटत आहेत. लोकांचे जीवनमान उंचावत आहे. जिल्ह्याचा विकास हेच माझे ध्येय आहे. त्यामुळे अशा धमक्यांना मी घाबरत नाही आणि लक्षही देत नाही, असे अन्न व औषध प्रशासन मंत्री धर्मरावबाबा आत्राम यांनी म्हटले आहे.