गडचिरोली : चामोर्शी पोलिस ठाण्याअंतर्गत येणाऱ्या कुदरसी टोला येथील एका घरी धाड टाकून तस्करी करण्यात येणाऱ्या खवले मांजराला ताब्यात घेऊन तिघांना अटक करण्यात आली. परराज्यातील व्यक्तीला खवल्या मांजराची विक्री करणार असल्याच्या माहितीवरून स्थानिक गुन्हे शाखेच्या पोलिसांनी ही कारवाई केली.

पोलिसांनी कुदरसी टोला येथील राजू घोती याच्या घरी जाऊन माहिती घेतली असता तेथे इरफान इनीयास सैफी (रा. धुंगराला, उत्तर प्रदेश) हा आढळून आला. हा आरोपी सध्या गडचिरोली येथील गोकुलनगर येथे राहतो. त्याला यासंदर्भात विचारपूस केली असता सुरुवातीला उडवाउडवीची उत्तरे देऊन पोलिसांची दिशाभूल करण्याचा प्रयत्न केला.

अधिक माहितीसाठी - वाढदिवसाला नातेवाईक बसले जेवायला; बॉक्स उघडताच सरकली पायाखालची जमीन

परंतु, पोलिसी खाक्‍या दाखवताच त्याने दुर्मिळ असलेल्या खवले मांजराचा गुप्तधन शोधण्यासाठी तसेच तिलिस्मी औषधीसाठी वापर होत असल्याचे सांगितले. या प्राण्याबद्दल लोकांमध्ये प्रचंड अंधविश्‍वास असल्याने खवले मांजराची आंतरराष्ट्रीय बाजारपेठेत फार मोठी किंमत मिळत असल्याचेही सांगितले.

इरफानने त्याचा साथीदार शकील बाबू सैफी (रा. सलाई, जि. हापूर, उत्तर प्रदेश) याचेही नाव सांगितले. हा आरोपी सध्या गडचिरोलीतील इंदिरानगर येथे ढोके यांच्या घरी भाड्याने राहतो. या दोघांसह खवल्या मांजर विक्री करण्यासाठी दोन दिवसांपूर्वी राजू आंदुलान घोती याच्या घरी आणले. खवले मांजर कुणाला दिसू नये म्हणून गावापासून लांब अंतरावर असलेल्या शेतामध्ये ठेवून त्याची विक्री करण्याचा बेत आखण्यात आला होता.

अधिक वाचा - पुलगावरून नागपूरला निघाले कुटुंब, पण वाटेतच मायबापांसह नवऱ्यावर काळाचा घाला

शकील बाबू सैफी आणि राजू घोती शेतात लपून बसल्याची माहिती मिळाल्याने रात्री घेरावबंदी करून त्यांना खवले मांजरासह ताब्यात घेतले. त्यानंतर खवले मांजर वनविभागाच्या ताब्यात देण्यात आले.