सध्या देशभरात नवरात्रीचा उत्सव उत्साहाने साजरा केला जात आहे. यादरम्यान देवदर्शनाहून परत निघालेल्या कारचा भीषण अपघात झाल्याची घटना समोर आली आहे. या दुर्घटनेत दोन जणांचा जागीच मृत्यू झाला असून तर ४ ते ५ भाविक गंभीर जखमी झाले आहेत. यवतमाळ जिल्ह्यातील पुसद-वाशिम महामार्गावरील सत्तरमाळ घाटात कार चालकाचे नियंत्रण सुटल्याने थेट झाडावर आदळली. आज सोमवारी (ता. ७) पहाटेच्या सुमारास ही घटना घडली. अपघाताची माहिती मिळताच पोलिसांनी घटनास्थळी धाव घेत बचावकार्य केले.

मिळालेल्या माहितीनुसार, दुर्घटनेनंतर जखमींना तातडीने उपचारासाठी रुग्णालयात दाखल करण्यात आले. दरम्यान जखमी प्रवाशांपैकी काही जणांची प्रकृती चिंताजनक असल्याचे सांगितले जात आहे. रेणुका मतेचे दर्शन घेऊन माहूरगडाहून आठ भाविक अहमदनगरकडे परतत होते.

पण पुसद-वाशिम महामार्गावरील सत्तरमाळ घाटाच कारवरील चालकाचे नियंत्रण सुटले आणि कार रस्त्याच्या कडेला असलेल्या झाडावर आदळली. या भीषण अपघातात कारचा जागीच चुराडा झाला, ज्यामध्ये दोन जणांचा मृत्यू झाला. मृतांची ओळख अद्याप पटलेली नाहीये.

दोन्ही मृतदेह शवविच्छेदनासाठी रुग्णालयात पाठवले असून जखमींना वाशिम आणी पुसद येथील रुग्णालयात उपचारासाठी दाखल करण्यात आलं आहे.