नागपूर : इंग्रजी म्हटले की अनेकांची बोंब असते. नगर परिषद, महापालिका, जिल्हा परिषदेच्या शाळेतील विद्यार्थ्यांच्या मनात इंग्रजीबाबत तशी भीतीही असते. हीच भीती भविष्यात विद्यार्थ्यांना या विषयात "परफेक्‍ट' होण्यास अवघड जाते. त्यामुळे "ऍक्‍टिव्हिटी बेस लर्निंग'द्वारे विद्यार्थ्यांच्या मनातील भीती दूर करून त्यांचा इंग्रजीकडे ओढा वाढविण्यासाठी औरंगाबादच्या आंग्लभाषा विभागातर्फे जिल्हा परिषदेच्या शाळांना "इंग्लिश किट' देण्यात येणार आहे.

नगर परिषद, महापालिका, जिल्हा परिषदेच्या शाळांतील विद्यार्थ्यांचे इंग्रजी तसे जेमतेमचं. नामांकित सीबीएसई शाळांप्रमाणे त्यांना इंग्रजीचा गंध आणि परिसरातील वातावरण मिळत नसल्याने या विषयात रसही निर्माण होण्याची शक्‍यता तशी कमीच असते. मात्र, जागतिक स्तरावरील इंग्रजी भाषेचे महत्त्व बघता, आता नगर परिषद, महापालिका, जिल्हा परिषदेच्या शाळांतील पहिली ते आठवीचा विद्यार्थी इंग्रजी विषयात पक्का व्हावा यासाठी औरंगाबाद येथील आंग्लभाषा विभागाद्वारे विद्यार्थ्यांसाठी "इंग्लिश किट' तयार करण्यात आली.

गुणवत्ता वाढविण्यासाठी प्रयत्न

यात पहिली ते पाचवीच्या विद्यार्थ्यांना एक तर सहावी ते आठवीच्या विद्यार्थ्यांसाठी वेगळी किट तयार करण्यात आली आहे. किटचा वापर करण्यासाठी शिक्षकांना प्रशिक्षणही देण्यात येत आहे. या किटच्या माध्यमातून इंग्रजी विषयाची भीती नाहिसी करणे आणि या विषयाची गुणवत्ता वाढविण्यासाठी प्रयत्न केले जाणार आहे.

अशी आहे "इंग्लिश किट'

"अक्‍टिव्हिटी बेस लर्निंग'वर आधारित असलेल्या "इंग्लिश किट'मध्ये चित्र, पझल्स, साउंड, कविता, वर्ड, सेंटेनस, व्हाईट बोर्ड, फोर लाइन्स कॉपी यासारख्या विविध वस्तूंचा समावेश आहे. या वस्तूंच्या आधारे विद्यार्थ्यांचे इंग्रजी पक्के करण्यात येईल. शिवाय विविध वर्कशिटच्या माध्यमातून त्यांच्या मनातील इंग्रजीची भीतीही दूर करण्यात येईल.

आंग्लभाषा विभागाद्वारे तयार करण्यात आलेल्या "इंग्लिश किट'चे प्रशिक्षण देण्यास सुरुवात झाली आहे. त्यामुळे लवकरच या किटचा उपयोग शाळांमध्ये होताना दिसेल.
- हर्षा बुराडे, प्राचार्य, जिल्हा शिक्षण व प्रशिक्षण केंद्र, (डायट)