विसापूर (जि. चंद्रपूर) - बल्लारपूर तालुक्यातील नांदगाव (पोडे) येथील रहिवासी घनश्याम झित्राजी पोडे यांचे ११ नोव्हेंबर रोजी निधन झाले. त्यांच्या अस्थींचे विसर्जन वर्धा-इरई संगमावर करताना चंद्रपूर कृषी उत्पन्न बाजार समितीचे उपसभापती गोविंदा पांडुरंग पोडे (वय ४७) यांच्यासह तिघांना जलसमाधी मिळाली.

ही घटना आज रविवारी (ता. २०) दुपारी २ वाजताच्या दरम्यान घडली. मृतांमध्ये गोविंदा पोडे यांच्यासह त्यांचा एकुलता मुलगा चेतन गोविंदा पोडे (वय १६) आणि त्यांचा भाचा गणेश रवींद्र उपरे (वय १७) यांचा समावेश आहे.

घनश्याम पोडे हे गोविंद पोडे यांचे मोठे वडील आहेत. आज रविवारी त्यांच्या अस्थींचे विसर्जन करण्यासाठी पोडे कुटुंबीय वर्धा- इरई नदीच्या संगमावर दुपारी १ वाजता गेले होते. पूजाविधी करून अस्थी विसर्जन करण्यात आले. त्यावेळी गोविंदा पोडे यांचा मुलगा चेतन व भाचा गणेश उपरे हे नदीपात्रात पोहत होते. कुटुंबियांनी त्यांना बाहेर येण्यास सांगितले. त्यामुळे ते दोघेही नदीतून बाहेर यायला निघाले.

मात्र, बाहेर निघत असताना ते पाण्याच्या वेगवान प्रवाहात लागले व त्यात वाहू लागले. मुलाला व भाच्याला वाहताना पाहून गोविंदा पोडे यांनी त्यांना वाचविण्यासाठी नदीत उडी घेतली. मात्र, तेदेखील कुटुंबातील अन्य सदस्यांसमोर वाहत्या पाण्याच्या प्रवाहात वाहून गेले.

घटनेची माहिती होताच पोलिस अधीक्षक रवींद्रसिंह परदेशी, बल्लारपूरचे पोलिस निरीक्षक उमेश पाटील, चंद्रपूर शहर ठाण्याचे पोलिस निरीक्षक सतीशसिंह राजपूत, बल्लारपूरच्या तहसीलदार डॉ. कांचन जगताप आणि परिसरातील नागरिकांनी धाव घेतली. शोध मोहिमेत सायंकाळी ५.४५ वाजता गोविंदा पोडे यांचा मुलगा चेतन पोडे याचा मृतदेह नावाड्यांनी बाहेर काढला. सायंकाळी ६.४५ वाजता भाचा गणेश उपरे यांचा मृतदेह बाहेर काढण्यात आला. गोविंदा पोडे यांचा शोध घेणे सुरू आहे.

गोविंदा पोडे हे बल्लारपूर पंचायत समितीचेदेखील माजी सभापती होते. या घटनेमुळे पंचक्रोशीत शोककळा पसरली आहे.