यवतमाळ : येथील शिवाजी गार्डन रोड परिसरातून दुचाकीवर बसवून गोधणीच्या जंगलात नेऊन अल्पवयीन मुलीवर सामूहिक अत्याचार करण्यात आला. ही घटना शनिवारी (ता.सात) व रविवारी (ता.आठ) घडली असून, या प्रकरणी अवधूतवाडी पोलिस ठाण्यात गुन्हा नोंदविण्यात आला. या घटनेमुळे खळबळ उडाली आहे.

आयुष प्रभाकर उकरे (वय १९, रा. तारपुरा), संकेत वसंता पेंदोर ( वय २१, रा. गोधणी), विष्णू राजू मेश्राम (वय २६, रा. डोर्ली), अभिजित गजानन भोंगे (वय २४, रा. साईबाबानगर) आणि सूरज अशी गुन्हा नोंद झालेल्यांची नावे आहेत. अल्पवयीन मुलगी शनिवारी (ता.सात) सकाळी दहा वाजतादरम्यान घरून एकटीच शिवाजी गार्डन येथे गेली होती. त्यावेळी आयूष, संकेत, विष्णू यांच्याशी तिची ओळख झाली.

त्यानंतर संकेतने दुचाकीवर बसवून गोधणीच्या जंगलात नेले. काही वेळाने विष्णूही एका वाहनाने आला. तिथे सामूहिक अत्याचार केल्यावर शिवाजी गार्डन येथे सोडून दिल्यावर पीडिता घरी गेली. रविवारी अल्पवयीन मुलगी आजीला मैत्रिणीकडे अभ्यासाला जात असल्याचे सांगून शिवाजी गार्डन येथे आली. यावेळी सूरज याच्या दुचाकीने भोसा येथील रुमवर गेली. रात्री दरम्यान चारवेळा जबरीने अत्याचार करून दुसऱ्या दिवशी सावरच्या बसस्थानकावर सोडून दिले.