अमरावती : दुचाकीने घरी परत जाणाऱ्या एका युवतीचा चायना मांजाने गळा चिरून मृत्यू (Death of a young woman by slitting her throat) झाला. ही घटना पुंडलिकबाबानगर परिसरात घडली. विद्या ऊर्फ सोनू शंकर गवई (वय २३) असे मृत युवतीचे नाव असल्याचे पोलिसांनी सांगितले. गाडगेनगर पोलिसांनी आता मांजा विक्रेत्यांवर शिकंजा कसण्याची तयारी सुरू केली आहे. या घटनेनंतर पुन्हा एकदा चायना मांजाच्या बंदीचा विषय समोर आला आहे. (Young-girl-Death-of-a-young-woman-by-slitting-her-throat-in-Amravati)

सोमवारी सायंकाळच्या सुमारास सोनू गवई ही रुग्णालयातील ड्यूटी आटोपून दुचाकीने घरी जात होती. याच दरम्यान पुंडलिकबाबानगराच्या परिसरात एका पतंगीचा मांजा तुटून तिच्या गळ्यात अडकला. मात्र, तिला याची कल्पना आली नाही. दुचाकीवर असल्याने लगेच मांज्याने तिचा गळा चिरला व दुचाकीसह खाली कोसळली. तिच्या गळ्यातून रक्ताच्या धारा वाहू लागल्या.

नागरिकांनी तिला तत्काळ जिल्हा सामान्य रुग्णालयात दाखल केले. गाडगेनगर पोलिसांनी नातेवाइकांना घटनेची माहिती दिली. त्यानंतर कुटुंबीय रुग्णालयात दाखल झाले. उपचारादरम्यान विद्या गवई हिचा मृत्यू झाला. त्यामुळे चायना मांजाच्या विक्रेत्यांबाबत प्रचंड संताप व्यक्त करण्यात येत आहे.

या घटनेनंतर पुन्हा एकदा शहरात चायना मांजाच्या बंदीचा फज्जा उडाल्याचे सिद्ध झाले आहे. चायना मांजावर बंदी असतानासुद्धा शहरात अनेक ठिकाणी सर्रासपणे हा मांजा विकला जातो. काही भागातील किराणा दुकानांमध्ये चायना मांजा सहजपणे विकला जात असल्याची माहिती आहे. गाडगेनगर पोलिसांनी याप्रकरणी गुन्हा दाखल करण्याची प्रक्रिया सुरू केली आहे.

(Young-girl-Death-of-a-young-woman-by-slitting-her-throat-in-Amravati)