मोखाडा - दारूच्या नशेत शिविगाळ केली, नंतर किरकोळ वादावादी झाली. त्या वादात मोखाड्यात महेश मोरे (वय-28) या तरुणाची बोथट हत्याराने डोक्यात वार करून हत्या केल्याची घटना घडली आहे‌‌. या घटनेची खबर मिळताच मोखाडा पोलिसांनी विरेंद्र उर्फ वीरु भोये (वय-19) या तरुणाला शुक्रवारी सकाळी अटक केली आहे. वाड्याच्या प्रथम वर्ग न्यायालयाने आरोपीस तीन दिवसांची पोलीस कोठडी सुनावली आहे.

मोखाडा पोलिसांनी दिलेल्या माहितीनुसार, मोखाड्यातील दर्गाआळी येथे रहाणारे आरोपी वीरेंद्र उर्फ वीरू भोये (वय-19) व मयत महेश मोरे (वय-28) यांच्यात सायकल फेकण्यावरुन वाद झाला. मयत महेश मोरे यांनी शिवीगाळ केली. याचा राग आल्याने वीरेंद्र भोये याने, महेश मोरे ह्याची बोथट हत्याराने डोक्यात व कानाच्या बाजुला वार करून हत्या केली आहे‌.

सदरची घटना गुरुवारी रात्री 12:00 वाजताच्या सुमारास घडली असून आरोपी वीरेंद्र याला मोखाडा पोलिसांनी शुक्रवार 4 ऑक्टोबर रोजी सकाळी 7च्या दरम्यान अटक केली आहे. आरोपी वीरेंद्र ला वाड्याच्या प्रथम वर्ग न्यायालयात हजर करण्यात आले. न्यायालयाने त्याला तीन दिवसांची 7 ऑक्टोबर पर्यंत  पोलिस कोठडी सुनावली आहे. या घटनेचा अधिक तपास मोखाडा पोलीस ठाण्याचे सहाय्यक पोलीस निरीक्षक प्रेमनाथ ढोले करत आहेत.