पुण्यात पावसाचा जोर वाढला आहे. २-३ दिवसांपासून सुरु असलेल्या पावसामुळे धरणं भरली आहेत. खडकवासला धरणातून पाण्याचा विसर्ग करण्यात आल्याने मुठा नदीला पूर आला आहे. त्यामुळे येरवडा भागातील ४००-५०० नागरिकांचे स्थलांतर करण्यात आलं आहे.

पुणे, पिंपरी-चिंचवड आणि आसपासच्या परिसरात भारतीय हवामान खात्याने पावसाचा रेडअलर्ट जारी केला आहे. खडकवासला भागात सध्या मुसळधार पाऊस होत असल्याने सध्या २७,००० क्युसेक इतका पाण्याचा विसर्ग सुरु आहे. नागरिकांनी सुद्धा सतर्क राहून काळजी घ्यावी, असे आवाहन करण्यात येत आहे.

मुख्यमंत्री एकनाथ शिंदे यांनी पुणे जिल्ह्यातील धोकादायक पूर रेषेच्या आत राहणाऱ्या नागरिकांना सुरक्षित स्थळी स्थलांतर करण्याचे आदेश दिले आहेत. पूर परिस्थिती निर्माण झाल्यास नागरिकांच्या सुरक्षेसाठी मुख्यमंत्री शिंदे यांचे विशेष लक्ष असून त्यांनी पुणे जिल्हाधिकारी, पुणे शहर महापालिका आयुक्त आणि आपतकालीन विभागातील वरिष्ठ अधिकाऱ्यांशी फोनवरून चर्चा केली.

मुख्यमंत्री शिंदे यांनी ब्लू लाईनच्या आत राहणाऱ्या सर्व नागरिकांना सुरक्षित स्थळी स्थलांतर करण्याचे आदेश दिले आहेत. तसेच, स्थलांतरीत नागरिकांसाठी दोन्ही वेळचे जेवण, राहण्याची सोय आणि त्यांना लागणारी मदत उपलब्ध करून देण्याचे आदेशही मुख्यमंत्री शिंदे यांनी सर्व अधिकाऱ्यांना दिले आहेत.