चिंचवड ता. ९ : यिन आणि प्रादेशिक परिवहन अधिकारी संदेश चव्हाण व उपप्रादेशिक परिवहन अधिकारी राहुल जाधव यांच्या माध्यमातून पिंपरी चिंचवड शहरातील विविध महाविद्यालयात रोड सेफ्टी जनजागृती कार्यक्रमाचे आयोजन करण्यात आले होते. चिंचवड मधील रसिकलाल माणिकचंद धारीवाल फार्मसी महाविद्यालयात हा कार्यक्रम पार पडला. या कार्यक्रमात प्रमुख पाहुणे मोटार वाहन निरीक्षक सुरज पवार, मोटार वाहन सहा. निरीक्षक धनराज नाईकवाडे, प्राचार्य डॉ. संजय वालोडे, 'यिन'चे राज्य सहा. व्यवस्थापक अनिकेत मोरे, यिन प्रतिनिधी ऋषिकेश औरादे यांची उपस्थिती होती.

त्यावेळी सुरज पवार म्हणाले, महाराष्ट्र परिवहन विभागामार्फत जनतेच्या सोयीसाठी ऑनलाइन सुविधा राबविण्यात आली आहे. याचा जास्तीत जास्त युवकांनी वापर करावा आणि वेळेची बचत करावी. राज्यात मृत्यूचे प्रमाण हे अपघातामुळे सर्वाधिक होत आहे. त्यामुळे वाहतुकीच्या नियमांचे पालन स्व: सुरक्षेसाठी करावे. रस्ता सुरक्षा बाबत विद्यार्थ्यांना पत्रक वाटून, त्यावर प्रश्नोत्तरासह सखोल मार्गदर्शन करण्यात आले. त्यावेळी महाविद्यालयाचे प्राचार्य डॉ. संजय वालोडे यांनी विद्यार्थ्यांना मार्गदर्शन केले. या कार्यक्रमाचे प्रास्ताविक अनिकेत मोरे यांनी केले. प्रा. ज्योती चौधरी यांनी संयोजन केले. सूत्रसंचालन रमेश पवार यांनी केले, तर आभार रोहन कासवा यांनी मानले.