'या' पदार्थांशिवाय अक्षय तृतीया ठरते अपूर्ण

मुंबई : अक्षयतृतीया साडेतीन मुहूर्तांपैकी एक शुभमुहूर्त समजला जातो. या दिवशीच्या विविध आख्ययिका ग्रंथांमध्ये पाहावयास मिळतात. या दिवशी काही गोडधोड आणि भोजनात वेगवेगळे पदार्थ तयार करण्याची प्रथा आहे.

चिंचोणी

अक्षय तृतीयेच्या दिवशी वऱ्हाडात चिंचोणीला विशेष महत्त्व आहे. गुळ, चिंच, विड्याची पाने, काथ, चुना, चिकन सुपारी, वेलची, वाळा, भिजवलेले तांदूळ, खोबरे, चिंचेचा कोळ, तूप, लवंग, खसखस, मीठ यांपासून चिंचोणी तयार करतात आणि ती मातीच्या घागरीत ठेवतात. मातीचा सुगंध आणि त्यातील जीवनसत्त्वे चिंचोणीमध्ये उतरतात.

कैरीचे पन्हे

कुकरमध्ये कैरी उकडून तिची साले काढली जातात. कैरीचा गर आणि साखर किंवा गूळ यांचे मिश्रण एकजीव केले जाते. त्यात थोडीशी वेलचिपूड घालून हे मिश्रण गाळले जाते. यातून मिळालेला कैरीचा लगदा फ्रीजमध्ये ठेवला जातो व गरजेनुसार वापरला जातो. पन्हे तयार करण्यासाठी लगदा, थंड पाणी व थोडेस मीठ यांचे मिश्रण केले जाते.

नारळाच्या करंज्या

खोबरे, गूळ, वेलची पूड यांचे मिश्रण शिजवावे. रवा, मैदा, गरम तूप, गार दूध एकत्र करून मळावे. मळलेल्या पिठाच्या पोळ्या लाटून त्यात खोबेर-गुळाचे सारण भरून करंज्या कराव्यात.

दुधीचा हलवा

अक्षय तृतीयेसारख्या महत्त्वाच्या सणाला गोडाधोडाचे पदार्थ करणं ओघाने आलंच. दुधी हलवा हा त्यापैकीच एक. दुधी किसून तो साखर आणि दुधासह शिजवला जातो. यात सुकामेवाही घातला जातो.

मालपोआ

मैदा, दूध, साखर, सुकामेवा यांपासून मालपोआ तयार केला जातो. तयार केलेल्या पिठाचे छोटे-छोटे मालपोए भिड्यावर किंवा पॅनवर काढले जातात. अक्षय तृतीयेचा सण आणखी गोड करायचा असेल तर मालपोआ नक्की करावेत.