Pranali Kodre
विम्बल्डन २०२४ स्पर्धेच्या पुरुष एकेरीचे विजेतेपद २१ वर्षीय कार्लोस अल्काराजने मिळवले. त्याने अंतिम सामन्यात नोव्हाक जोकोविचला ६-२, ६-२, ७-६ (७-४) अशा सरळ तीन सेटमध्ये पराभूत केले.
अल्काराजचे हे एकूण चौथे ग्रँडस्लॅम, तर दुसरे विम्बल्डन विजेतेपद आहे.अल्काराजने यापूर्वी अमेरिका ओपन २०२२ आणि फ्रेंच ओपन २०२४ या ग्रँडस्लॅम स्पर्धांचेही विजेतेपद जिंकले आहे.
त्यामुळे तो साल १९६८ नंतर एकाच वर्षात फ्रेंच ओपन आणि विम्बल्डन जिंकणारा तो रॉड लेव्हर, ब्योर्न बॉर्ग, राफेल नदाल, रॉजर फेडरर आणि नोवाक जोकोविच यांच्यानंतरचा सहावा खेळा़डू ठरला आहे.
अल्काराजने आत्तापर्यंत चार ग्रँडस्लॅमचे अंतिम सामने खेळले असून चारही वेळा विजेतेपद जिंकले आहे. ओपन एरामध्ये असा पराक्रम करणारा रॉजर फेडररनंतरचा तो दुसराच पुरुष टेनिसपटू आहे. फेडररने पहिले सात ग्रँडस्लॅम अंतिम सामने जिंकले होते.
अल्काराज सलग दोन विम्बल्डन जिंकणारा स्पेनचा पहिलाच खेळाडू आहे.
तसेच २१ व्या शतकात फेडरर, नदाल आणि जोकोविच यांच्याव्यतिरिक्त पुरुष एकेरीत चार ग्रँडस्लॅम जिंकणारा एकमेव खेळाडू आहे.
अल्काराज ग्रँडस्लॅमच्या अंतिम सामन्यात जोकोविचला सरळ तीन सेटमध्ये पराभूत करणारा पाचवाच खेळाडू आहे. यापूर्वी फेडरर (२००७ अमेरिकन ओपन), अँडी मरे (विम्बल्डन २०१३), नदाल (फ्रेंच ओपन २०२०), डॅनिल मेदवेदेव (अमेरिकन ओपन २०२१) यांनी असा पराक्रम केलाय.
बिग थ्री म्हणजेच फेडरर (२३ वर्षे), नदाल (२२ वर्षे) आणि जोकोविच (२४ वर्षे) यांच्यापेक्षा कमी वयात अल्काराजने ४ ग्रँडस्लॅम जिंकले आहे.
तसेच बिग थ्री पेक्षा कमी सामने खेळतही अल्काराजने चार ग्रँडस्लॅम जिंकले आहेत. चौथे ग्रँडस्लॅम जिंकण्यासाठी फेडररने ७९, नदालने ८१ आणि जोकोविचने १३४ सामने खेळले होते.