नेदरलँड्सविरुद्ध भारताच्या नऊ खेळाडूंनी का केली गोलंदाजी?

भारतीय क्रिकेट संघाने सर्व लीग सामने जिंकून आयसीसी एकदिवसीय वर्ल्ड कपच्या उपांत्य फेरीत धडक मारली आहे.

नेदरलँड्सविरुद्ध झालेल्या अखेरच्या लीग सामन्यात विजय मिळवत टीम इंडियाने विजयी मोहीम सुरू ठेवली आहे.

महत्वाचे म्हणजे गोलंदाजांसोबत रोहित शर्मा, शुभमन गिल, विराट कोहली आणि सूर्यकुमार यादव यांनी देखील नेदरलँड्सविरुद्ध गोलंदाजी केली.

इतकेच नाही तर विराट कोहली आणि रोहित शर्मा याला एक-एक विकेट देखील मिळाला.

विराट कोहलीने 3 षटकात 13 धावा देऊन 1 बळी घेतला तर कर्णधार रोहितने केवळ 5 चेंडू टाकले आणि 1 बळी घेतला.

सामना संपल्यानंतर कर्णधार रोहितला याबाबत विचारले असता तो म्हणाला, जेव्हा तुमच्याकडे फक्त 5 गोलंदाज असतात, तेव्हा तुम्ही तुमच्या संघात काही पर्याय निर्माण करण्याचा प्रयत्न करता.

रोहित म्हणाला की, आज आमच्याकडे 9 पर्याय होते. आजचा सामना ज्यामध्ये आम्ही काही गोष्टी करून पाहिल्या, हे खूप महत्त्वाचे आहे.

गरज नसताना आमचे वेगवान गोलंदाज वाईड यॉर्करचा प्रयत्न करत होते. बॉलिंग युनिट म्हणून आम्ही काहीतरी वेगळे करण्याचा प्रयत्न करत होतो. यातून काय साध्य करता येईल हे पाहायचे होते, असेही रोहित म्हणाला.