Pranali Kodre
विम्बल्डन २०२४ स्पर्धेच्या पुरुष एकेरीचे विजेतेपद २१ वर्षीय कार्लोस अल्काराजने मिळवले.
त्याने अंतिम सामन्यात नोव्हाक जोकोविचला ६-२, ६-२, ७-६ (७-४) अशा सरळ तीन सेटमध्ये पराभूत केले.
स्पेनच्या अल्काराजचे हे दुसरे विम्बल्डन, तर एकूण चौथे ग्रँडस्लॅम विजेतेपद आहे.
महत्त्वाचे म्हणजे अल्काराजने दोन्ही विम्बल्डन विजेतीपदं अंतिम सामन्यात जोकोविचला पराभूत करत जिंकले आहे.
अल्काराजच्या या विजयानंतर भारताचा महान क्रिकेटपटू सचिन तेंडुलकरनेही त्याचे कौतुक केले आहे.
सचिनने त्याच्या ट्वीटमध्ये लिहिले, 'आतापासून टेनिसवर एकच राज करेल, तो म्हणजे अल्काराज.'
सचिनने पुढे लिहिले, 'जागतिक दर्जाच्या प्रतिस्पर्ध्याविरुद्ध सरळ सेटमध्ये मात करत विम्बल्डन फायनल जिंकणे हा काही जोक नाही. त्याच्याकडे असलेला वेग, ताकद, ऊर्जा आणि प्लेसमेंट, याचा फायदा अल्काराजला येणाऱ्या वर्षांमध्ये होणार आहे.'
सचिनने जोकोविचचे देखील कौतुक केले. त्याने म्हटले, 'नोव्हाक जोकोविचलाही सलाम, तो विजय आणि पराजय यामध्ये स्वत:चा समतोल राखतो. एका चांगल्या खेळाडूचे हे लक्षण आहे.'
अल्काराजने यापूर्वी अमेरिका ओपन २०२२ आणि फ्रेंच ओपन २०२४ या ग्रँडस्लॅम स्पर्धांचेही विजेतेपद जिंकले आहे.