सकाळ डिजिटल टीम
तारळे : लष्करी कँपमध्ये परेड करतानाच आलेल्या हृदयविकाराच्या धक्क्याने डिगेवाडी (ता. पाटण) येथील जवान संदीप केशव सपकाळ (वय ४०) यांचा पुणे येथे मृत्यू झाला.
जवानांवर काल दुपारी एकच्या सुमारास डिगेवाडी येथे शासकीय इतमामात अंत्यसंस्कार करण्यात आले. यावेळी कुटुंबाने फोडलेल्या हंबरड्याने उपस्थितांचे मन हेलावून गेले होते.
अनेकांच्या डोळ्यांच्या कडा ओलावल्या होत्या. तारळे मुरूड परिसरातील लोकांनी हजारोंची गर्दी करत साश्रूपूर्ण नयनांनी संदीप यांना अखेरचा निरोप दिला.
संदीप यांचे प्राथमिक व माध्यमिक शिक्षण मुरुडमध्ये झाले. शाळकरी वयातच देशसेवेचे ध्येय उराशी बाळगून ध्येयासाठी झगडत केवळ एकविसाव्या वर्षी ते सैन्यदलात भरती झाले होते.
संदीप यांनी आपली प्रदीर्घ देशसेवा बेळगाव, जम्मू, आसाम, काश्मीर आदी ठिकाणी बजावली. दोनेक वर्षांपूर्वी त्यांची नाईक हवालदार या पदावर बढती मिळाली होती.
काल सकाळी त्यांचे पार्थिव गावी आणले. मार्गात जागोजागी गावकऱ्यांनी रस्त्याच्या दुतर्फा उभे राहून जवान संदीप यांना श्रद्धांजली वाहत पार्थिवावर पुष्पवृष्टी केली. नागठाणे, कोंजवडे, आवर्डे मार्गे मुरूड व शेवटी डिगेवाडीतील घरी, सजवलेल्या गाडीतून संदीप यांचे पार्थिव आणण्यात आले.
गोरेवाडी, डिगेवाडी येथे शाळकरी मुलांसह गावकऱ्यांनी रस्त्याला कडे केले होते. पार्थिव घराजवळ आणताच आई, पत्नी, मुली यांचा आक्रोश हृदय पिळवटून टाकणारा होता. त्यानंतर माळरानावर तयार केलेल्या ग्राउंडवर त्यांचे पार्थिव आणण्यात आले.
तेथे तहसीलदार रमेश पाटील, पोलिस उपअधीक्षक अमोल ठाकूर, सहायक पोलिस निरीक्षक प्रशांत बधे यांनी पार्थिवावर पुष्पचक्र अर्पण केले. त्यानंतर पोलिस व सैन्य दलातील जवानांनी हवेत बंदुकीच्या फैरी झाडून त्यांना मानवंदना दिली. शेवटी त्यांचा पुतण्या अक्षय यांनी भडाग्नी दिला. (फोटो : यशवंतदत्त बेंद्रे)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.