आशुतोष मसगौंडे
तेलुगु देसम पार्टीचे सुप्रीमो एन चंद्राबाबू नायडू 12 जून 2024 रोजी आंध्र प्रदेशचे मुख्यमंत्री म्हणून शपथ घेतील.
चंद्राबाबू नायडू चौथ्यांदा राज्याचे मुख्यमंत्री होणार आहेत. अमरावती येथे हा शपथविधी सोहळा पार पडणार असून, नरेंद्र मोदींसह अनेक केंद्रीय मंत्री उपस्थित राहणार आहेत.
यापूर्वी चंद्राबाबू नायडू यांनी 1 सप्टेंबर 1995, 11 ऑक्टोबर 1999 आणि 8 जून 2014 अशा तीन वेळा मुख्यमंत्री म्हणून शपथ घेतली होती.
2019 च्या विधानसभा निवडणुकीत वायएसआरसीपीचे अध्यक्ष जगन मोहन रेड्डी यांनी टीडीपीचा पराभव करून नायडूंकडून सत्ता हिसकावून घेतली.
एन चंद्राबाबू नायडू यांचे पूर्ण नाव नारा चंद्राबाबू नायडू आहे. त्यांचा जन्म 20 एप्रिल 1950 रोजी आंध्र प्रदेशातील चित्तूर जिल्ह्यातील नरावरीपल्ली गावात झाला.
नायडू यांनी युवक काँग्रेसचे नेते म्हणून राजकारणाला सुरुवात केली. आणीबाणीनंतर त्यांनी काँग्रेस पक्षात प्रवेश केला. नायडू 1978 मध्ये चंद्रगिरीतून आमदार म्हणून पहिल्यांदा विधानसभेत पोहोचले.
सुप्रसिद्ध अभिनेते आणि टीडीपीचे संस्थापक एन टी रामाराव (एनटीआर) यांची मुलगी नारा भुवनेश्वरीशी लग्न केले.
लग्नानंतरही नायडू काँग्रेसमध्येच होते, पण 1983 च्या विधानसभा निवडणुकीत ते टीडीपीच्या उमेदवाराकडून पराभूत झाले. यानंतर त्यांनी काँग्रेस सोडून टीडीपीमध्ये प्रवेश केला.