टाळ-मृदुंगाचा गजर अन् मुखी हरिनाम... बाल वारकऱ्यांच्या रिंगण सोहळ्याने जिंकली मने

‘श्रीसंतांचिया माथा चरणावरी, साष्टांग हे करी दंडवत। विश्रांती पावलो सांभाळ उतरी, वाढले अंतरी प्रेमसुख।। विठ्ठल-विठ्ठल म्हणा वेळो-वेळा। हा सुखसोहळा स्वर्गी नाही।।’

संत तुकोबारायांच्या या अभंगातील ओढ दर्शविणाऱ्या वर्णनाप्रमाणेच आळंदी (देवाची) येथील श्री विठ्ठल वारकरी शिक्षण संस्थेच्या विद्यार्थ्यांनी त्यांनी अनुभवलेल्या सोहळ्याचे वर्णन केले.

वारकरी संस्थेत दररोज मिळणाऱ्या आध्यात्मिक सेवेचे धडे घेत माउलींच्या नामस्मरणात तल्लीन असणाऱ्या या चिमुकल्यांनी स्वर्गीही अनुभूती मिळणार नाही, अशा क्षणांचा लाभ घेतल्याची भावना व्यक्त केली.

पांढरा कुर्ता, पांढरे धोतर, कपाळी टिळा आणि गळ्यात टाळ घेत पारंपरिक वेशात हे बालवारकरी सहभागी झाले होते.

अठरा संतांच्या पादुकांचे दर्शन एकाच ठिकाणी मिळणार म्हटल्यावर होणारा आनंद बालमुखांवर ओसंडत होता.

आळंदी येथील या संस्थेत चौथीपासून दहावीपर्यंतचे विद्यार्थी शिक्षण घेतात. या उत्सवानिमित्ताने सर्व संतांच्या पादुकांचे दर्शन घेण्याचे भाग्य लाभले, असेही या मुलांनी नमूद केले.

विद्यालयातील चाळीस मुले या उत्सवात सहभागी झाली. हरिपाठ, संतांचे अभंगांच्या माध्यमातून भगवंतांचे नामस्मरण करीत ही मंडळी मुंबई नगरीत दाखल झाली.

हा सोहळा आम्हा बालवारकऱ्यांसाठी आयुष्यभर स्मरणात राहील, असेही या विद्यार्थ्यांनी नमूद केले. आध्यात्मिक शिक्षणासह विद्यार्थ्यांचे कलात्मक गुण विकसित व्हावे, म्हणून ही संस्था कार्यरत आहे.

मृदंग, तबला, टाळ अशा वादनासह गायनाचे धडेदेखील ही मंडळी गिरवितात. यातील काही विद्यार्थी या सोहळ्यात सहभागी होऊ शकले नाहीत.

एकाच ठिकाणी १८ पादुकांचे दर्शन घेण्याचे भाग्य आपल्या सवंगड्यांना मिळत असून आपण यात सहभागी होऊ शकत नसल्याने या विद्यार्थ्यांना अश्रू अनावर झाल्याची आठवण सतीश महाराज भिताडे यांनी सांगितली.

टाळ-मृदुंगाचा गजर आणि मुखी हरिनाम... आळंदी येथून आलेल्या बाल वारकऱ्यांनी घातलेल्या रिंगण सोहळ्याने भाविकांची मने जिंकली.

श्रीगुरू पादुका दर्शन उत्सवाला सुरुवात होत असतानाच मुख्य प्रवेशद्वारात बाल वारकऱ्यांची दिंडी आणि रिंगण पाहण्याची संधी भाविकांना मिळाली. 

या वेळी सतीश महाराज भिंताडे, अरविंद सैद यांच्यासह चाळीस विद्यार्थी सहभागी झाले होते.

मंत्री सामंत, लोढांनी घेतला 'पादुका दर्शना'चा लाभ