Sandip Kapde
गेले दोन दिवस वाशीच्या सिडको एक्झिबिशन सेंटर येथे भक्तीचा सागर उसळलेला पाहायला मिळाला.
सकाळ, श्री फॅमिली गाईड प्रोग्रॅमच्या वतीने आयोजित श्री गुरू पादुका दर्शन उत्सवात महाराष्ट्र, पंजाब येथून १८ सद्गुरू, संतांच्या पादुका वाशीत आणण्यात आल्या होत्या.
याची देही याची डोळा या पादुका पाहण्यासाठी असंख्य भाविकांनी तुडुंब गर्दी केली. भगवे झेंडे, वारकऱ्यांचा रिंगण सोहळा, श्री पादुकांची मिरवणूक अशी अवघी पंढरीच वाशीत अवतरली होती.
२६ आणि २७ मार्च रोजी श्रीगुरू पादुका दर्शन उत्सवाचे आयोजन करण्यात आले होते.
गेले दोन दिवस या पादुकांचे दर्शन घेण्यासाठी संपूर्ण महाराष्ट्रातून असंख्य भाविक आले होते.
सकाळी श्री पादुका विठ्ठल विठ्ठल, ज्ञानोबा माऊली तुकाराम, रामकृष्ण हरी, दिगंबरा दिगंबराच्या जयघोषात मंदिरात विराजमान झाल्या.
याचे दर्शन घेण्यासाठी भाविकांनी सकाळपासूनच गर्दी केली होती. श्री पादुकांचे मनोभावे दर्शन घेतल्यानंतर डोळ्यांचे पारणे फिटल्याची प्रतिक्रिया उपस्थित भाविकांनी दिली.
दुपारी डोक्यावर तुळशी, टाळ, विणा आणि विठू नामाचा जयघोष करत वारकऱ्यांनी दिंडी काढली.
श्री पादुकांचे दर्शन घेतल्यानंतर ज्ञान मार्ग, भक्ती मार्ग, कर्म आणि सेवा मार्ग तसेच लक्ष्मी मार्ग या स्टॉलना भेट देऊन तेथून सद्सद्विवेक बुद्धीला चालना देणारे विचार घेतले. त्यानंतर भाविकांनी महाप्रसादाचा लाभ घेतला.
घंटा नाद, शंख नाद तसेच ज्ञानोबा, माऊलींच्या गजरामुळे या ठिकाणी भक्तीमय वातावरण निर्माण झाले होते.
सायंकाळी सुनील तांबे यांचे ओंकार जप, सामूहिक अग्निहोत्राचा विधी, स्टेफिनि फाईस्ट, श्री गुरू एम, पुरुषोत्तम राजीमवाले, 'एपी ग्लोबल 'चे संस्थापक आणि सकाळ माध्यम समूहाचे व्यवस्थापकीय संचालक अभिजित पवार यांच्या अभिभाषण आणि व्याख्यानाचा कार्यक्रम झाला.
दरम्यान या कार्यक्रमादरम्यान गुरू श्री एम यांचा सकाळ माध्यम समूहाचे संचालक प्रतापराव पवार यांच्या हस्ते तर गायक शंकर महादेवन यांचा सकाळ माध्यम समूहाचे मुख्य संपादक सम्राट फडणीस यांच्या हस्ते सत्कार करण्यात आला.
त्यानंतर गायक शंकर महादेवन यांच्या सांगीतिक कार्यक्रमाला सुरुवात झाली. सांगीतिक कार्यक्रमाचा आनंद घेत रात्री उशिरा या कार्यक्रमाची सांगता झाली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.