Pranali Kodre
बिग बॉस मराठीचा पाचवा सिजन नुकताच संपला. यंदाचा हा सिजन मोठ्या प्रमाणात गाजला. या सिजनने टीआरपीचेही नवे उचांक गाठले.
दरम्यान, या सिजनचे विजेतेपद सूरज चव्हाणला मिळाले, तर उपविजेता प्रसिद्ध गायक अभिजीत सावंत ठरला.
अभिजीतने या सिजनमध्ये आपल्या संयमी, शांत आणि सुस्वभावी खेळ दाखवत अनेकांची मनं जिंकली.
त्याचमुळे त्याचं कौतुक म्हणून खास बिग बॉस मराठी सिजन पाचचे होस्ट रितेश देशमुख यांनी त्याला लय भारी असं लिहिलेली आणि त्याखाली बिग बॉसचा लोगो असलेली ट्रॉफी भेट म्हणून दिली.
या ट्रॉफीचा व्हिडिओ देखील अभिजीतने शेअर केला असून त्याने कॅप्शनमध्ये लिहिले की 'खूप खूप धन्यवाद रितेश भाऊ, तुम्हाला माझा गेम आवडला, मी तुमचं मन जिंकलं ह्याचा मला खूप आनंद आहे. आणि ही लय भारी trophy तुम्ही मला दिली त्या साठी मनापासून आभार!'.
अभिजीतने पोस्ट केलेल्या या व्हिडिओवर रितेश देशमुख यांची पत्नी आणि अभिनेत्री जिनिलियानेही (Genelia Deshmukh) कमेंट केली आहे.
जिनिलिया यांनी लिहिले की 'अभिजीत तू सन्मानाने आणि हुशारीने खूप चांगला खेळलाच. तुझं खरंच कौतुक आहे.'