अर्थबोध : ‘द झुरिक ॲक्सिअम्स’

या पुस्तकाचे लेखक मॅक्स गुंथर यांनी काही वर्षे ‘टाइम’ मासिकाचे संपादक म्हणून काम केले व त्यांनी गुंतवणूक या विषयावर अनेक पुस्तके लिहिली आहेत. स्वित्झर्लंडमधील बँकर्स ‘रिस्क मॅनेजमेंट’साठी पिढ्यानपिढ्या वापरत असलेली १२ मोठी व १६ छोटी स्वयंसिद्ध तत्त्वे, म्हणजे ज्या तत्त्वांना पुराव्याची गरज नसते, ती लेखकाने या पुस्तकात वर्णन केली आहेत. त्यापैकी काही ठळक तत्वे अशी-

• तुम्हाला तुमच्या गुंतवणुकीबद्दल चिंता सतावत नसेल तर तुम्ही पुरेशी जोखीम पत्करत नाही, असे समजावे! धाडसी आयुष्य जगणाऱ्यांसाठी थोडीफार चिंता आवश्यकच असते.

• नफा कमावण्याची संधी क्वचितच मिळते व त्यामुळे अशी संधी मिळेल तेव्हा ती वाया घालवू नका.

• गुंतवणूक करताना प्रत्येकाच्या हातून चुका होतात. परंतु, अशी चूक झाल्यास प्रार्थना न करता आपली चूक मान्य करा आणि अशा गुंतवणुकीतून ताबडतोब बाहेर पडा.

• भविष्यात काय होईल हे कोणीच छातीठोकपणे सांगू शकत नाही, त्यामुळे सर्व भाकीतांकडे दुर्लक्ष करा. बरीच तज्ज्ञ मंडळी सतत उलट-सुलट भाकीते करीत असतात व त्यातील बरोबर आलेल्या भाकितांचा ढिंढोरा पिटत असतात, हे ध्यानात घ्या.

• अर्थविश्वात कोणतेच पॅटर्न अस्तित्वात नसतात व त्यामुळे नको तेथे पॅटर्न शोधायचा प्रयत्न करू नका.

• कोणत्याही गुंतवणुकीत भावनिकरित्या गुंतून पडू नका. चांगली संधी इतरत्र उपलब्ध असल्यास जुन्या गुंतवणुकीतून बाहेर पडा.

• गुंतवणूक करताना आशावादी असावे. परंतु, त्याला सबळ कारणे असावीत. आशावादाला नेहमी आत्मविश्वासाची जोड असावी. हा आत्मविश्वास असा असावा, की माझा निर्णय चुकल्यास मी फार मोठे नुकसान न होता या गुंतवणुकीतून बाहेर पडू शकेन.

गुंतवणूक म्हणजे ‘रिस्क’ आणि ‘रिवॉर्ड’ या दोन खांबांवरील तारेवरची कसरत असते व ही कसरत यशस्वीरीत्या कशी पार पाडायची, हे जाणून घेऊ इच्छिणाऱ्यांसाठी हे पुस्तक निश्चितच मार्गदर्शक ठरेल.