येत्या ९ महिन्यात ८० टक्क्यांनी वाढू शकतो 'हा' शेअर

अमारा राजा बॅटरीज या कंपनीने गेल्या एका वर्षात उत्तम कामगिरी केली आहे. मात्र गेल्या वर्षात या कंपनीच्या समभागात केवळ ११ टक्क्यांची वाढ झाली आहे. तर त्याच काळात निफ्टीमध्ये मात्र ५० टक्क्यांनी वाढ पाहायला मिळाली आहे. यंदाच्या वर्षातील आतापर्यंतच्या कामगिरीबद्दल बोलायचं झाल्यास यंदा Amara Raja या कंपनीने निफ्टीच्या तुलनेत कमी प्रमाणात वाढ दाखवली आहे. यंदा या कंपनीच्या शेअरमध्ये १९ टक्क्यांची घसरण झालेली पाहायला मिळतेय. तुलनेत निफ्टीमध्ये मात्र १२ टक्क्यांनी वाढ पाहायला मिळते आहे तर बॉम्बे स्टॉक एक्सचेंजचा BSE 200 index देखील १५ टक्के वधारला आहे.

आता पुढे गुंतवणुकीबाबत काय असावी रणनीती?

अमारा राजा बॅटरीज या कंपनीचं भांडवल तब्बल १२ हजार कोटी रुपयांपेक्षा अधिकचं आहे. त्यामुळे येत्या काळात या कंपनीच्या शेअरमध्ये मोठी रॅली पाहायला मिळू शकते असं शेअर बाजारातील जाणकार म्हणतायत. पुढील सहा महिन्यात या कंपनीच्या शेअरची किंमत मागील ५२ आठवड्यातील उच्चांकी किमतीच्या वर म्हणजेच १ हजार २५ रुपयांच्या वर जाऊ शकते, असंही तज्ज्ञाना वाटतं आहे.

जाणून घ्या टार्गेट्स

रिलायसन्स सेक्युरिटीजच्या जतीन गोहिल यांच्या मते जास्त अवधीसाठी विचार केल्यास मूव्हिंग ऍव्हरेज इंडिकेटर तेजी दर्शविते आहे. त्यामुळे जतीन गोहिल यांनी या कंपनीच्या शेअर्ससाठी १ हजार ११५ ते १ हजार ३५० रुपयांचं टार्गेट दिलेलं आहे. हे टार्गेट २२ जूनच्या क्लोजिंग किमतीपेक्षा तब्बल ५० ते ८० टक्के अधिक आहे. या खरेदीसाठी जतीन यांनी ६३० रुपयांचा स्टॉपलॉस सुचवला आहे.

इलेक्ट्रिक गाड्यांच्या थीम मुळे कंपनीचा फायदा

अमारा राजा बॅटरीज ही अमारा राजा समूहाची प्रमुख कंपनी आहे. ऑटो सेक्टरमध्ये गरजेच्या असणाऱ्या बॅटरीच्या तंत्रज्ञानावर कंपनीकडून मोठ्या प्रमाणात काम केलं जातं. भारतात या कंपनीचा चांगला बोलबाला आहे, सोबतच ३२ विविध देशांमध्ये देखील कंपनी आपल्या बॅटरीज निर्यात करते. अनलॉक झाल्यानंतर, सोबतच इलेक्ट्रिक गाड्यांच्या थीम मुळे या कंपनीचा तगडा फायदा होऊ शकतो.