वृद्ध पालकांचा आरोग्य विमा घेतला नाही तरी मिळेल कर सवलतीचा लाभ!

जर तुम्ही तुमच्या वृद्ध आई- वडिलांचा आरोग्य विमा (Health Insurance) घेतला नसेल आणि त्यांच्या वैद्यकीय सुविधांवर दरवर्षी काही रुपये खर्च करत असाल, तर तुम्ही हा खर्च आयकर (Income Tax) कलम 80-डी मध्ये दाखवून देखील कर सूट (Tax Exemption) मिळवू शकता. आयकर कायद्यात याची तरतूद करण्यात आली आहे. (Even if you do not have health insurance for elderly parents, you will still get the benefit of tax relief)

बहुतेक नोकरदार मंडळी अनभिज्ञच

अनेक नोकरदार लोक काही कारणांमुळे वृद्ध आई- वडिलांसाठी आरोग्य विमा काढू शकत नाहीत. मात्र त्यांच्या किरकोळ आजारांवर, औषधे व इतर वैद्यकीय तपासण्यांवर दरवर्षी खर्च करावा लागतो. बरेच लोक त्यांच्या आयकर रिटर्नमध्ये (Income Tax Return) हा अतिरिक्त वैद्यकीय खर्च देखील दाखवत नाहीत. किंबहुना या खर्चाला प्राप्तिकरातूनही सूट मिळते, हेही त्यांना माहीत नाही.

आयकराचे कलम 80D नुसार...

प्राप्तिकर कायदा 1961 च्या कलम 80D च्या तरतुदींनुसार, एखाद्या व्यक्तीला त्याच्या वृद्ध आई- वडिलांच्या (वय 60 वर्षे किंवा त्याहून अधिक) आरोग्यासाठी केलेल्या पेमेंटसाठी वार्षिक 50,000 रुपयांपर्यंत सूट मिळते. या देयकांमध्ये वार्षिक 50,000 रुपयांपर्यंतचा आरोग्य विमा प्रीमियम आणि वैद्यकीय तपासणीसाठी वार्षिक 5,000 रुपयांपर्यंतचा समावेश आहे. तसेच, विमा न घेतल्यास वार्षिक 50,000 रुपयांपर्यंतचा वैद्यकीय खर्च ()Medical Expenses देखील त्यात समाविष्ट केला आहे.

येथे करू शकत नाही तुम्ही दावा

जर तुम्ही आधीच पालकांचा आरोग्य विमा काढला असेल तर तुम्ही अतिरिक्त वैद्यकीय खर्चासाठी कपातीचा दावा करू शकणार नाही. तथापि, एखादी व्यक्ती आरोग्य तपासणीसाठी वार्षिक पाच हजार रुपयांपर्यंत पेमेंटचा दावा करू शकते.