Gautam Adani : टॉप-10 मधून बाहेर गेलेले अदानी पुन्हा श्रीमंतांच्या यादीत; अंबानींची आणखी एका स्थानाने घसरण!

Gautam Adani News : अमेरिकेची संशोधन संस्था हिंडनबर्गच्या (Hindenburg Report) अहवालानंतर गौतम अदानी (Gautam Adani) यांच्या साम्राज्याला मोठा हादरा बसला होता. श्रीमंतांच्या यादीत चौथ्या स्थानी असलेले गौतम अदानी टॉप-10 मधूनच बाहेर फेकले गेले होते.

अमेरिकन इन्व्हेस्टमेंट रिसर्च फर्म आणि शॉर्ट सेलर हिंडनबर्गनं गौतम अदानी यांना काल (मंगळवार) ब्लूमबर्ग बिलियनेअर इंडेक्सच्या टॉप-10 अब्जाधीशांच्या यादीतून वगळलं होतं. मात्र, आज पुन्हा अदानी टॉप-10 यादीत परतले आहेत. मात्र, यावर्षी सर्वाधिक संपत्ती गमावणाऱ्या श्रीमंतांमध्ये अदानी हे पहिल्या क्रमांकावर आहेत.

अदानींनी कार्लोस स्लिमला टाकलं मागं

ब्लूमबर्ग बिलियनेअर इंडेक्सच्या (Bloomberg Billionaires Index) ताज्या अहवालात गौतम अदानी आता कार्लोस स्लिमला मागं टाकत 11 व्या स्थानावरून 10 व्या स्थानावर पोहोचले आहेत. त्यांच्या खालोखाल कार्लोस स्लिमचा क्रमांक लागतो, तर अंबानी एका स्थानाच्या नुकसानासह 13 व्या स्थानावर आहेत. त्यांची संपत्ती 81.5 अब्ज आहे. तर अदानींची संपत्ती 86.4 अब्ज आहे.

मुकेश अंबानी पोहोचले 13 व्या स्थानावर

गेल्या वर्षी जगातील टॉप-10 श्रीमंतांच्या यादीत केवळ मुकेश अंबानी (Mukesh Ambani) आणि गौतम अदानी यांच्या संपत्तीत वाढ झाली होती. मागील वर्षी कमाईतही अदानी पहिल्या क्रमांकावर होते. या वर्षी मुकेश अंबानी ब्लूमबर्ग बिलियनेअर इंडेक्सच्या टॉप-10 अब्जाधीशांपैकी 13 व्या स्थानावर पोहोचले आहेत.

DMart च्या दमाणींचंही मोठं नुकसान

अदानी समूहाचे अध्यक्ष गौतम अदानी या वर्षी संपत्तीच्या नुकसानीच्या बाबतीत जगातील अब्जाधीशांच्या यादीत अव्वल स्थानावर आहेत. त्यांनी आतापर्यंत 36 अब्ज गमावले आहेत. त्यांच्यानंतर रिलायन्स समूहाचे अध्यक्ष मुकेश अंबानी यांचा नंबर लागतो. या वर्षात अंबानींचं आतापर्यंत 5.59 अब्ज डॉलरचं नुकसान झालंय. तर, तिसऱ्या क्रमांकावर DMart चे राधाकृष्ण दमाणी आहेत. त्यांचं 2.51 अब्ज डॉलर्सचं नुकसान झालंय.