सोने व्यावसायिकांच्या बंदला देशभरात चांगला प्रतिसाद ; संघटनेचा दावा

मुंबई : सोन्याच्या दागिन्यांना हॉलमार्क (gold hallmark) तसेच हॉलमार्क युनीक आयडीकोड (hallmark unique id must) सक्तीचे करण्याच्या केंद्र सरकारच्या नियमांविरोधात (central government rules) देशभरातील सोने व्यावसायिकांनी (gold traders) केलेल्या संपाला (strike) चांगला प्रतिसाद मिळाल्याचा दावा त्यांच्या संघटनांनी केला आहे. केवळ मुंबईतील जव्हेरी बाजारमधील (Zaveri market) इमिटेशन ज्वेलरीचे काम करणाऱ्या व्यावसायिकांनी आज नेहमीप्रमाणे काम सुरु ठेवले होते. देशातील सोन्याच्या मोठ्या ब्रँडची काही दुकाने सुरु होती.

यासंदर्भात देशातील सुवर्णकार संघटनांनी स्थापन केलेल्या टास्क फोर्सतर्फे या संपाची हाक देण्यात आली होती. आज देशभरातील प्रमुख सोन्याच्या व्यावसायिकांनी आपले व्यवसाय बंद ठेवून या हाकेला चांगला प्रतिसाद दिला, अशी माहिती टास्क फोर्स च्या कोअर कमिटीचे सदस्य दिनेश जैन यांनी सकाळ ला दिली. मुंबईतही अनेक दुकाने सकाळी सुरु झाली होती, मात्र नंतर बंद चे आवाहन करण्यात आल्याने आम्हीही दुकाने बंद ठेवली असे गिरगावच्या विष्णू सखाराम ज्वेलर्सचे पुरुषोत्तम काळे यांनी सकाळ ला सांगितले.

महाराष्ट्रात बंद ला 95 टक्के प्रतिसाद मिळाला, मुंबईतही बहुसंख्य दुकाने बंद होती. फक्त गोंदिया जिल्ह्यात सध्या हॉलमार्कची सक्ती असल्याने तेथे बंद नव्हता, असे टास्क फोर्सचे सदस्य व महाराष्ट्र राज्य सराफ सुवर्णकार फेडरेशनचे अध्यक्ष फतेहचंद रांका यांनी सकाळ ला सांगितले. वामन हरी पेठे ज्वेलर्सची सगळी दुकाने बंद होती, असे आशिष पेठे यांनी सांगितले.

सोने व्यावसायिकांसमोरील अडचणींना आम्ही वाचा फोडली आहे. केंद्रीय ग्राहक मंत्रालयाची आम्हाला सहानुभूती आहे, मात्र अंमलबजावणी करणारे अधिकारी व ब्युरो ऑफ इंडियन स्टँडर्ड आमच्या मागण्या अजून मान्य करीत नाहीत. इतर उद्योगांपेक्षा सोने उद्योगाचे प्रश्न वेगळे आहेत. हॉलमार्क एकवेळ ठीक आहे, पण एचयूआयडी ची सक्ती नको. त्यामुळे सरकारने यासंदर्भात त्रयस्थ मान्यवर व्यक्तीच्या अध्यक्षतेखाली समिती तयार करावी. त्यात ग्राहक संघटना, सोने व्यावसायिक, सरकार यांचे प्रतिनिधी असावेत व त्या समितीने याप्रश्नी निर्णय द्यावा, अशी मागणी दिनेश जैन यांनी केली.