सेवा क्षेत्राच्या वाढीचा दर उच्चांकी

नवी दिल्ली - मागणी वाढल्यामुळे देशातील सेवा क्षेत्राच्या वाढीने मे महिन्यात गेल्या ११ वर्षांतील उच्चांक नोंदवला आहे. मे महिन्यात सेवाक्षेत्राच्या वाढीचा निर्देशांक ५८.९ नोंदवला गेला. एप्रिलमध्ये तो ५७.९ होता. एप्रिल २०११ नंतर प्रथमच ही एवढी वाढ नोंदवली गेली आहे, असे एस. अँड पी. ग्लोबल इंडिया सर्व्हिसेसने आपल्या मासिक सर्वेक्षण अहवालात म्हटले आहे. मात्र महागाईमुळे उत्पादन खर्चात वाढ झाल्याचा दबावही या क्षेत्रावर दिसत असून, महागाईच्या दबावामुळे नोकरीच्या आघाडीवर सेवा क्षेत्रातील कंपन्यांनी मे महिन्यात अतिरिक्त कामगार घेण्याचे टाळले आहे. त्यामुळे रोजगारामध्ये किरकोळ घट झाली, असेही या सर्वेक्षण अहवालात म्हटले आहे.

अधिकृत आकडेवारीनुसार, २०२१-२२ च्या चौथ्या तिमाहीत भारताची अर्थव्यवस्था ४.१ टक्क्यांनी वाढली आणि वार्षिक विकास दर ८.७ टक्क्यांपर्यंत वाढला. चलनवाढीमुळे रिझव्‍‌र्ह बँकेने मे महिन्यात रेपोदर ४० आधारभूत अंकांनी वाढवला होता. आता ८ जून रोजी पतधोरण समितीच्या बैठकीत अशीच उपाययोजना केली जाण्याची अपेक्षा आहे, असेही या अहवालात नमूद करण्यात आले आहे.

कोविड-१९ नंतर रुळावर आलेल्या भारतीय अर्थव्यवस्थेत मागणी वाढल्याने नवीन व्यवसायाच्या वाढीलाही गती आली. परिणामी सेवा क्षेत्रालाही चालना मिळाली आहे. मात्र अन्नधान्य, इंधन, मजुरी, वाहतूक खर्च यांत वाढ झाल्याने सेवा क्षेत्रातील कंपन्यांवर दबाव वाढला आहे. हा वाढीव खर्चाचा भार ग्राहकांकडे वळवण्याशिवाय पर्याय नसल्याचे अनेक कंपन्यांनी म्हटले आहे.

- पॉलिआना डी. लिमा, सहसंचालक एस. अँड पी. ग्लोबल (आर्थिक विभाग)