प्रधानमंत्री वय वंदन योजनेतून ज्येष्ठ नागरिकांना मिळणार पेन्शनचा लाभ; जाणून घ्या

Pradhan Mantri Vaya Vandana Yojana: प्रधानमंत्री वय वंदन योजनेंतर्गत, 60 वर्ष किंवा त्याहून अधिक वयाच्या नागरिकांनी मासिक पेन्शनचा पर्याय निवडल्यास त्यांना 10 वर्षांसाठी 8% व्याज मिळेल, तर वार्षिक पेन्शन निवडल्यास त्यांना 10 वर्षांसाठी 8.3% व्याज मिळेल. या योजनेअंतर्गत ज्येष्ठ नागरिकांना त्यांच्या गुंतवणुकीवर चांगले व्याज मिळते. ही योजना सोशल सिक्युरिटी स्कीम आणि पेन्शन प्लॅन आहे. ही योजना भारत सरकारने सुरू केली आहे, पण ती LIC द्वारे चालवली जात आहे. या योजनेंतर्गत कमाल गुंतवणुकीची मर्यादा 15 लाख रुपये निश्चित करण्यात आली आहे.

अशी गुंतवणूक करा-

प्रधानमंत्री वय वंदन योजनेत गुंतवणूक करण्यासाठी, ग्राहक ऑनलाइन आणि ऑफलाइन दोन्ही अर्ज करू शकतात. तुम्हाला ऑनलाइन अर्ज करायचा असेल, तर तुम्ही एलआयसीच्या अधिकृत वेबसाइटवरून करू शकता. ऑफलाइन अर्ज करण्यासाठी, तुम्ही LIC च्या शाखेत जाऊन प्रधानमंत्री वय वंदना योजनेचा लाभ घेऊ शकता.

प्रधानमंत्री वय वंदन योजनेचे फायदे-

1. या योजनेत करसवलत नाही, ही फक्त गुंतवणूक योजना आहे.

2. 60 वर्षांवरील लोक जास्तीत जास्त 15 लाख रुपयांपर्यंत गुंतवणूक करू शकतात. यासाठी तुम्हाला 31 मार्च 2023 पूर्वी अर्ज करावा लागेल.

3. सामान्य विमा योजना आणि मुदत विमा योजनांवर 18% GST आकारला जातो. मात्र या योजनेत जीएसटीवर सूट आहे.

4. गुंतवणुकीच्या आधारावर नागरिकांना 1,000 रुपये ते 9,250 रुपये प्रति महिना पेन्शन मिळते.

पॉलिसी मागेही घेता येते-

पॉलिसी घेतल्याच्या काही दिवसांत तुम्हाला त्यात गुंतवणूक चालू ठेवायची नाही असे वाटत असल्यास, तुम्ही ती काढू शकता. जर तुम्ही ही पॉलिसी ऑनलाइन खरेदी केली असेल तर 30 दिवसांच्या आत आणि जर तुम्ही ऑफलाइन पॉलिसी खरेदी केली असेल तर तुम्ही ती 15 दिवसांच्या आत परत घेऊ शकता.