खासगीकरणाची प्रक्रिया लवकरच; सहा बँकांना वगळलं

नवी दिल्ली - रिझर्व्ह बँकेचे गव्हर्नर शक्तीकांत दास यांनी सार्वजनिक क्षेत्रातील बँकांच्या (पीएसबी) खासगीकरणाची प्रक्रिया लवकरच सुरू होईल, अशी आशा व्यक्त केली आहे. दास म्हणाले, की आम्ही सार्वजनिक क्षेत्रातील बँकांच्या खासगीकरणाबाबत सरकारशी चर्चा करीत आहोत आणि लवकरच या संदर्भात ही प्रक्रिया पुढे नेण्यात येईल. एका कार्यक्रमात दास म्हणाले, ‘सार्वजनिक क्षेत्रातील बँकांचे खासगीकरण कोणत्याही परिस्थितीत केले जाईल.’

अर्थमंत्री निर्मला सीतारामन यांनी २०२१-२२ या आर्थिक वर्षाचा अर्थसंकल्प सादर करताना यावर्षी दोन सार्वजनिक क्षेत्रातील बँका आणि एका विमा कंपनीच्या खासगीकरणाची घोषणा केली होती. सीतारामन यांनी मंगळवारी बँकांच्या खासगीकरणात या संस्थांमध्ये काम करणाऱ्या कर्मचाऱ्‍यांच्या हिताची काळजी घेतली जाईल, असे सांगितले होते. त्या म्हणाल्या, की प्रत्येक बँक खासगी होईल असे समजणे योग्य नाही. वर्षानुवर्षे या बँकांमध्ये काम करणाऱ्या कर्मचाऱ्‍यांच्या हिताची काळजी घेतली जाईल.

अर्थविश्वातील इतर बातम्या वाचण्यासाठी क्लिक करा

‘या’ सहा बँकांचे होणार नाही खासगीकरण
नीति आयोगाने सार्वजनिक क्षेत्रातील सहा बँकांना खासगीकरण योजनेतून वगळले आहे. यामध्ये पंजाब नॅशनल बँक (पीएनबी), युनियन बँक, कॅनरा बँक, इंडियन बँक, बँक ऑफ बडोदा आणि स्टेट बँक यांचा समावेश आहे. या बँका एकत्रीकरणाच्या मागील फेऱ्यांचा भाग होते. सरकारने ऑगस्ट २०१९ मध्ये १० बँकांचे ४ बँकांमध्ये विलीनीकरण केले. यामुळे देशातील सार्वजनिक क्षेत्रातील बँकांची संख्या २७ वरून १२ वर आली आहे.