Sensex : शेअरबाजारांना हुडहुडी; सेन्सेक्स ६३६ अंश घसरला

मुंबई - अमेरिकी फेडरल बँक बैठकीतील निर्णयाच्या धसक्यामुळे आज पुन्हा जागतिक शेअरबाजारांसह भारतीय शेअर बाजारांनी सुमारे एक टक्का लोळण घेतली. सेन्सेक्स ६३६.७५ अंश घसरून ६१ हजारांच्या खाली आला तर १८९.६० अंश घसरलेला निफ्टी जेमतेम अठरा हजारांच्या वर टिकून राहिला.

अमेरिकी फेडरल बँक व्याजदरवाढ करेल या भीतीने आज बहुतेक आशियाई शेअर बाजार तसेच अमेरिकी शेअर बाजार मोठा तोटा दाखवीत होते. लौकरच येणारा या बैठकीचा तपशील तसेच अमेरिकी उत्पादनाचा तपशील यात नेमके काय असेल या शंकेने सगळीकडेच घबराट पसरलेली होती. त्याचे अनुकरण भारतीय शेअर बाजारांनीही केले व मोठ्या शेअरमध्ये विक्री झाली. सकाळी व्यवहार सुरू होतानाच बाजार तोटा दाखवीत होते व नंतर तो तोटा वाढतच गेला. दिवसअखेर सेन्सेक्स ६०,६५७.४५ अंशावर तर निफ्टी १८,०४२.९५ अंशांवर स्थिरावला.

आज जवळपास सर्वच क्षेत्रांच्या शेअरमध्ये जोरदार विक्री झाली. पण त्यातही धातूनिर्मिती आणि बांधकाम व्यवसाय क्षेत्र सर्वात जास्त म्हणजे दोन टक्के कोलमडली. निफ्टी मधील जे. एस. डब्ल्यू. स्टील व हिंदाल्को या दोन्ही शेअर चे भाव प्रत्येकी चार टक्के कोसळले. तर टाटा स्टीलही अडीच टक्क्यांनी कोसळला. वेदांत तर्फे या वर्षाच्या तिसऱ्या तिमाही मधील उत्पादनाचा तपशील कमी असल्याचे जाहीर करण्यात आले. त्यामुळे भविष्याच्या भीतीने या क्षेत्रातील सर्वच शेअरचे भाव कोलमडले. निफ्टी मध्ये डॉक्टर रेड्डीज लॅब, अल्ट्राटेक सिमेंट, मारुती, डीव्हीज लॅब या शेअरचे भाव किरकोळ वाढले.

आज सेन्सेक्स मधील प्रमुख ३० पैकी २७ शेअरचे भाव कोसळले तर निफ्टीच्या मुख्य ५० पैकी ४३ शेअरचे भाव पडले. आज एनएसई मधील १,४८२ शेअरचे भाव तोटा दाखवीत होते तर ५५४ शेअर्सचे भाव नफ्यात होते. बीएससी वरील २,३५१ म्हणजेच ६४ टक्के शेअरचे भाव पडले होते तर १,१३६ म्हणजे ३१ टक्के शेअरचे भाव वाढले. केवळ १४० शेअरचे भाव कालच्या इतकेच राहिले होते.

सेन्सेक्स मधील मारुती, अल्ट्राटेक सिमेंट व टीसीएस या शेअर चे भाव किरकोळ वाढले. तर टाटा स्टील, पॉवरग्रीड, टाटा मोटर, विप्रो, इन्फोसिस, एचडीएफसी बँक या शेअरचे भाव दोन टक्के कोसळले. एचडीएफसी, रिलायन्स इंडस्ट्रीज, आणि इंडसइंडबँक या शेअरचे भाव दीड टक्का कमी झाले. तर आयटीसी, स्टेट बँक, बजाज फिन्सर्व्ह, महिंद्र आणि महिंद्र, नेस्ले, लार्सन टुब्रो या शेअरचे भाव एक टक्का कोसळले.

आज पडझड झाली तरी तळाच्या भावाला म्हणजे अठरा हजारांच्या जवळपास खरेदी सुरु होण्याची शक्यता आहे. बँका व आयटी क्षेत्राचे निकाल चांगले येण्याची शक्यता असल्याने त्या क्षेत्रांवर सर्वांचे लक्ष राहील. तर अर्थसंकल्प जवळ येत असल्याने विमा, खतनिर्मिती, कृषी आदी शेअरच्या भावातही चढउतार होईल. - सिद्धार्थ खेमका, मोतीलाल ओसवाल फायनान्शिअल सर्व्हिसेस.