टाटा स्टीलची क्षमता वाढणार; कोट्यवधींच्या भांडवली खर्चाची योजना

नवी दिल्ली- जगातील सर्वात मोठ्या स्टील कंपन्यांपैकी एक असलेल्या टाटा स्टीलची देशातील क्षमता वाढवण्यासाठी चालू आर्थिक वर्षात 8,000 कोटी रुपयांचा भांडवली खर्च (Expenditure)केला जाईल. या गुंतवणुकीतील मोठा हिस्सा ओडिशातील कलिंगनगर प्रकल्पाची क्षमता वाढवणे, खाणकाम आणि पुनर्वापर व्यवसाय (Recycling Business)वाढविणे यासाठी वापरला जाईल अशी माहिती कंपनीचे मुख्य कार्यकारी अधिकारी टी. व्ही. नरेंद्रन यांनी दिली. (Finance Latest News)

याशिवाय, कंपनी आपला युरोपियन व्यवसाय मजबूत करण्यासाठी आणि उत्पादनांची संख्या वाढवण्यासाठी 3,000 कोटी रुपये खर्च करीत आहे. आम्ही कच्च्या मालावरही खर्च करणार असल्याचे टी. व्ही. नरेंद्रन म्हणाले. कलिंगनगर प्रकल्पाच्या विस्तारात मदत करण्यासाठी लोह खनिज खाणकामदेखील वाढवणार असल्याची माहिती त्यांनी दिली. कलिंगनगर प्रकल्पाची क्षमता वार्षिक50 लाख टन (MTPA)वाढवण्याची टाटा स्टीलची योजना आहे.

रिसायकलिंग प्लांट्स उभारण्याच्या शक्यतेबद्दल विचारले असता नरेंद्र म्हणाले की,कंपनी स्क्रॅपमध्ये वेगळ्या व्यवसाय मॉडेलवर (Business Model) चालते. यासाठी भागीदारी केली जाईल असेही ते म्हणाले. आमच्याकडे स्क्रॅपसाठी एक वेगळे व्यवसाय मॉडेल असल्याचे नरेंद्रन यांनी स्पष्ट केले. यात भागीदारांच्या वतीने एक प्लांट टाकला जातो. आम्ही गुणवत्ता राखतो आणि स्टील विकतो असेही ते म्हणाले.

स्क्रॅप अर्थात भंगारासाठी पश्चिम आणि दक्षिण प्रदेशांचा विचार करत असल्याचही नरेंद्रन म्हणाले, कारण या भागात मोठ्या प्रमाणात भंगार उपलब्ध आहे. रिसायकलिंग प्लांट्स तिथेच उभारले पाहिजे जिथे जास्त प्रमाणात भंगार असेल असेही ते म्हणाले.